堅

返咗四日工,晚晚瞓得嗰幾個鍾,呢幾日都勁唔夠瞓.今日仲堅!七點幾起身,九點出門口,返到會展準時十點半.冇乜嘢做,清閒到想死,更加加強咗睡魔o既招喚...好不容易咁捱到五點半收工,即一支劍咁飛返公司拎返啲嘢過去還返畀個客.一心諗住九秒九極速搞掂佢,然後等好友愛麗絲由澳門返o黎一齊食飯.點知...都預咗呢個客唔會咁易搞得掂.結果傾咗個幾鍾至搞掂晒啲嘢,而愛麗絲又打o黎話趕唔切返o黎同傻魚食飯喎.見冇乜時間,唯有去搵麥叔叔草草搞掂個晚餐算喇.
返到屋企都已經九點幾,極速沖咗涼,執埋啲行李,十點鍾就收到黃氏三少電話話過緊o黎接傻魚去機場.老爺問使唔使幫手抬啲行李落樓.傻魚見今次都唔係好重,加上老爺咁啱又感冒,自己都搞得掂就費時搞住啲老人家.老爺同奶奶送傻魚出門口,望住傻魚入升降機.雖然都唔係第一次,仲一年起碼三次,但係傻魚都唔敢回頭望.呢啲位唔多唔少都會有啲傷感o既感覺.
去到機場十一點.搞埋啲登機手續,寄埋行李之後見冇乜嘢做,又冇乜嘢買,唯有入閘等時間過囉.今次冇搵人加磅,啲行李加埋都係廿三公斤.兩個月都冇又返香港喇...唔使帶咁多嘢喇.出咗境見口渴諗住搵"兜巴星"飲返杯嘢...撞鬼佢,收晒舖喎...咁又係...都成十一點幾喇...唯有忍多兩個幾鍾上機至飲囉.咁得閒梗係擺部腦出o黎上網喇.不過機場個無線慢到嘔...搞咗好耐至上到網.同傻馬傾咗一陣之後,傻馬又夠鍾搵周千金談情.仲有個幾鍾至登機,好鬼眼瞓添o架~今晚應該都瞓唔到o架喇...嘩~唔係講笑,真係攰到企喺度都瞓得著.
咁耐冇返傻家,唔知傻家變成乜樣...好擔心...