大工程

今日原本約咗個日本人去見大人物.但係傻魚今晚有個大工程要搞,仲要等郵差叔叔送個大包裹o黎,所以就求其搵個藉口推咗佢.個日本人仲不停咁話呢個大人物好難約,下次可能冇機會見...傻魚都冇話想見...

傻馬今日食晏影o既...原來傻馬同啲同事一齊食西餐.香港都有呢間店...

今日搞乜大工程咁巴閉?!!咪包雲吞囉...唔係感冒流鼻水嗰隻喎...慢慢包,包咗個幾鍾...

包完雲吞,用咗一半o黎整雲吞雞湯.傻馬話個湯好好味,遲啲要買個砂煲至得.跟住蒸咗個蒜茸粉絲扇貝仔.因為懶切蒜粒,所以用超市買o既蒜泥.結果辣得滯,蓋晒扇貝仔啲鮮味.不過傻馬勁愛蒜茸,所以食到津津有味.今日傻馬食得比傻魚快,食完仲飲晒成大煲湯.傻馬見雪櫃仲有一半雲吞,叫傻魚聽日又整多煲喎.真係好味得緊要?!!難得傻馬鍾意食,又食得多,聽日再整囉!食咁多嘢都唔肥,唔通傻馬真係生蟲?!!

傑作

今日落咗成日雨,傻魚攤喺露台窗邊睇咗大半日雨景,好鬼寫意!傻魚好鍾意落雨天,尤其係唔使出街嗰陣.到咗傍晚時分都仲係落緊雨,傻魚唯有雨中漫步去買餸.由于之前買o既一袋水菜仲有三分二,所以今日去買餸嗰陣見到有其他o既沙律菜就諗住今晚又整沙律.咁啱傻馬打o黎話想食鰹魚,冇理由兩日都係食鰹魚沙律o架...諗諗下...哎~算喇...又鰹魚沙律囉...

唔想一連兩日都食同一樣嘢,結果就搞成咁喇.好有心機咁堆到成座山咁高,搞搞新意思切咗啲茄仔伴碟.碟沙律食極都食唔完...當然今晚唔係齋食沙律喇.仲整咗個白汁雞!冇錯!係白汁!今次冇搞錯!!!因為同之前整o既白咖哩賣相一樣,所以今次冇影相.聽日食乜?嘩!!!聽日就大工程囉...

又加磅

今日打個雪櫃,見到好多買咗幾日o既餸.諗咗一諗,決定今日消滅晒佢.再睇一睇,冇肉喎...啊~有罐午餐肉!聽日又要出去買餸喇!以後都係唔好一次過買咁多...

今餐將啲舊材料一鑊熟炒雜齋,落咗少少胡椒粉同辣油.傻馬話個汁撈飯好好味.之前煎炸菜肉餅用唔晒o既炸菜粒,傻馬當零食咁食.前日買o既鰹魚同水菜,切完淋啲柚子酸汁.原本諗住撈埋一堆食,但係傻馬話分開好啲喎...是旦喇!都係食落肚啫!今餐食得好鬼飽呀!死喇!又加磅喇!!!如果可以過啲肥膏俾傻馬就好喇...哎...都係開枝黑醋飲去下脂至得...

俾人老點...

做乜點傻魚啫?!!傻魚啲答案唔好笑o架...傻魚凈係識笑人o架咋...哎...是旦喇...

最想收到的生日禮物:

所有親朋戚友冇病冇痛, 人人開心冇煩惱, 免費機票去環遊世界, 唔憂柴唔憂米唔憂冇公仔書睇

點你的人是誰?

夢成真

你跟他是甚麼關係?

部落格友

寫出你對他的五個好印象:

聰明,感性,懂得人情世故,好有上進心,懂得享受

他對你做過最深刻的事:

喺傻魚唔開心o既時候開解同安慰傻魚

他跟你說過最深刻的說話:

好多喎...

如果他變成你的情人,你會因為他的那一方面而令你喜歡他呢?

靠得住!

如果他變成你的敵人,你會因為他的那一方面而令你討厭他呢?

點傻魚!

現在你最想他對你做的一件事:

o黎日本一齊玩

你覺得周圍的人認為你是怎樣的人?

無聊,低能,懶醒,為食

想成為的理想類型是:

人見人爱,車見車載

給關心自己,喜歡自己的人大喊一句吧:

傻魚唔做煮飯婆呀!!!

把這份問卷傳給你最想知道他對你的感覺的十個人:

唔傳喇!人哋點睇傻魚係人哋o既事...知o黎都冇用...傻魚依然會傻魚行傻魚素!

都話咗唔好笑o架喇!!!下不為例!!!

傳銷

由細到大身邊都有好多做傳銷同保險o既親戚朋友,見過唔少醜陋o既情節.所以由細到大都好抗拒傳銷同保險.偏偏就有好多人鍾意搵傻魚做目標.係咪因為傻魚份人太天真,太愚蠢,太耳仔軟,太易俾人洗腦,所以成日俾人鎖定為水魚?好多時都係俾人呃咗去啲乜乜講座,聽人講完一堆嘢之後就俾人半軟禁.但係就冇人成功說服傻魚加入佢哋o既行列,更冇人成功喺傻魚身上得到半點油水.

點解今日會講呢個話題?兩個星期前,有位兩年冇連絡過o既日本人突然打俾傻魚.對方知道傻魚喺東京就留咗個日本手提電話號碼俾傻魚.仲話自己過幾日會返日本,叫傻魚到時俾個電話佢約出o黎食飯.所謂無事不登三寶殿.咁耐冇連絡,唔會無端端諗起傻魚.傻魚冇依照對方o既"指示"喺幾日後俾電話對方.原本諗住唔搵對方.但係傻魚o既工作好多時係要靠人脈同關係,可能有一日傻魚會需要對方o既幫助.飲餐茶仔啫...睇下佢搞邊料都好.話唔定會搵到新商業靈感.

其實係抱住搵佢唔到o既心態打呢個電話.可惜呢個人仲喺日本,接咗傻魚個電話.結果即刻約咗個時間會合,仲話想約埋傻馬食飯.咁醒目o既傻魚一聽就知係乜事喇.即時就推咗對方呢個邀請,只應承單拖去飲餐茶仔.一見到面,對方就開始"演講".之後仲俾咗一堆資料傻魚返屋企慢慢"研究".傻魚梗係睬佢都傻喇.臨走前仲話想介紹幾個大人物俾傻魚識,約傻魚過幾日一齊"同游".有餐飯仔食傻魚梗係唔拘喇!仲可以識多幾個有錢人,幾好呀!反正冇蝕低,一於逢陪!!!點解傻魚咁老定?因為傻魚冇錢囉!好在呢個日本人都冇點洗傻魚個腦.就算想洗都洗唔到喇!傻魚冇腦o架嘛!!!

暈游?!!

好耐冇玩通頂...之後仲要冇得訓繼續去玩...真係人都會癲!!!今朝傻馬起身之後原本係要同傻魚一齊去拎電話.但係傻魚想留力所以點咗傻馬自己一個去拎,而自己就留喺屋企抖抖.傻馬拎完電話返到o黎,一人一部係咁搞啲電話設定.之後傻馬話不如去下北沢行下,咁咪去新宿搭車囉.途中魚肚仔好鬼嘈,諗去去食排骨飯,但係傻馬話要食拉麵,咁咪跟傻馬去咗一間經常都會經過o既拉麵店食.

大(兩個麵),中(個半麵),細(正常一個麵)都係同一個價-六百円.咁傻馬就要咗個中,傻魚要咗個細加隻蛋(一百円).傻魚分咗半隻蛋俾傻馬.

呢間拉麵個湯低唔錯.湯面有一層細細粒o既肥糕粒仔漂浮,但係一啲都唔覺肥膩.

食完搭火車去下北沢,行咗兩個幾鍾,好在冇暈低...哈!臨走前見到有間超市啲菜幾平,咁咪入去睇睇囉.入得去又點會空手而回呀...結果買埋餸至走.返到屋企擺低啲嘢,傻馬又話想去新宿睇睇.傻馬知傻魚好攰,所以就自己一個驅車去.傻魚抖咗成個鍾,又要開工煮飯仔喇.

之前食剩啲肉碎同炸菜,頭痛唔想諗咪又整炸菜肉餅跟住就咁煎.凈係食肉唔係咁好,所以整多個餸同湯.原本仲想煎幾條魚仔食,傻馬唔想傻魚攰死所以話今日唔想食魚.咁又留返聽晚食喇.個湯咁多料,夠食喇!依家個頭好鬼痛,今晚要早啲訓...

狂歡

尋日一訓醒,傻馬已經話要出街.求其整咗個菠菜腸仔即食麵食,跟住就去咗新宿花園神社.傻馬一心諗住有祭典睇,點知今年冇要等明年...雖然冇祭典,但係神社周圍都有好多屋台.傻魚見到好多好好味o既食物,好後悔食咗碗麵至出門...逛咗一陣,就去附近睇手提電話.傻馬話先出一部俾傻魚,遲啲至出多部俾自己.傻魚睇中一部零機價o既手提,可惜搵咗好多間都冇貨.終於行到好攰諗住返屋企嗰陣,咁啱經過一間賣手提電話o既舖仔.諗住入去睇一睇,冇就返歸...點知咁啱間嘢有貨喎...咁梗係即刻申請喇!結果申請完要等一個鍾至有得拎.咁咪到附近機舖睇下人哋打機囉...期間傻馬諗諗下又想出返部一樣o既俾自己.

一個鍾之後返去拎電話嗰陣同個哥哥仔講要出多部一樣o既.咁咪又填多份申請表格囉.仲諗住即時有得拎,點知等咗半個鍾都仲未得.哥哥仔話因為同一個名義出兩部電話,啲手續要重新搞過,所以要今日至可以拎.約咗個時間,跟住傻馬同傻魚就即刻飛車返屋企.尋晚約咗網友主婦兩公婆同三個朋友仔去食飯同唱歌,遲到添...返到屋企擺低架車同啲嘢,即刻打咗個電話俾網友主婦.點知網友主婦冇接電話喎...傻馬同傻魚快步赶去集合點,途中接到網友主婦o既電話,話唔使急會等埋傻魚.原本傻馬話唔去,因為出電話搞夜咗所以咪跟埋傻魚一齊去食飯囉...一班嘩鬼去到某間朝鮮料理店,鯨吞咗三十枝羊肉串,五枝牛肉串,幾個小菜,四碗白飯同九杯飲品.之後一行七人浩浩蕩蕩咁去咗傻魚屋企樓下睇環境...送完傻馬返屋企,一行六人漫步去唱歌.

間店俾咗間細房,都唔緊要...迫迫哋親熱啲囉...最弊係個遙控成日都冇電...換咗幾次,用冇幾耐又冇電...搞到個店員哥仔都好唔好意思,係咁不斷道歉.一心諗住o黎狂歡,點知就俾呢個咁o既冇電遙控掃晒興...網友主婦同老公因為今朝有啲事所以早走.凈返四個就唱到正話五點至散會.其餘三位朋友仔走去搵麥叔叔,而傻魚就返屋企搵傻馬喇...狂歡完,依家冇得訓...因為一陣又要同傻馬一齊出去拎電話,然後唔知傻馬又想去邊玩.唔緊要囉...死魚一條,頂到今晚早啲訓囉...