好嘢!!!

今日儍馬開始返新工,公司派咗部去到邊都上到網o既公司腦俾儍馬.所以儍魚終於可以喺屋企訓喺度上網喇!好嘢!!!呢個時候梗係要講下o黎咗日本咁耐搞咗啲乜喇...

四月二十號朝早七點鍾,朋友仔揸架貨車仔o黎載儍馬一家去機場.儍馬同儍魚二人總共帶咗三個大行李同四個袋.因為今次唔係去玩,所以買機票時指定要將行李重量升級.行李送機倉前一上磅,嘩!三個大行李總重量係六十八公斤!!!象徵式拎起少少嘢,六十六公斤送機倉.跟住就同老爺奶奶去食早餐.食完就慢慢入閘,奶奶邊送邊喊,搞到儍魚都想喊...班機遲咗少少到達成田空港,喺空港一人買一張"西瓜卡",去到儍馬姨千葉屋企度都成五點半.儍馬姨屋企喺四樓,仲要係冇升降機...儍馬分三次將六十六公斤抬上四樓.擺低啲行李,抖順條氣,儍馬姨話去食燒肉.結果嗰晚搞到成點鍾至訓...

四月二十一號好鬼忙,一早起身出東京睇樓.原本約咗三間不動產,結果第一間搞耐咗,睇得嗰三間屋,唯有打俾第二間改第二日.三間屋得第一間係睇得下又近火車站,儍馬都幾鍾意.儍魚就麻麻哋鍾意,個浴厠唔得,同埋間屋舊.跟住去第三間不動產,介紹咗兩間屋.雖然係細啲,但係儍魚非常滿意.兩間屋都係新裝修,但係儍馬就話離火車站遠咗啲.睇完樓,原本約咗儍馬個朋友食飯,但係因為睇樓睇夜咗,所以就改第二日.求其食咗啲嘢就打道回府喇!由東京返儍馬姨度要成兩個鍾,轉兩次車...呢日又係攰到爆!!!

四月二十二號都係去東京睇樓.因為太攰,所以取消咗朝早嗰間唔去.呢日睇咗三間屋,又細又舊又遠...都係之前睇嗰兩間正!!!之後約儍馬個朋友去居酒屋.食到八點半就各自回歸.

四月二十三號又去東京睇樓.但係都係冇正嘢,少少失望.四周圍逛下,到七點鍾約咗儍魚個前上司去食飯.當然係前上司請喇!!!儍馬係咁狂食刺身,吞拿魚呀,海膽呀,好鬼開胃.埋單好似係萬幾円,好在唔使夾返份...睇咗咁多間屋,都係覺得第一日o既第四間最好.前上司加把口,儍馬終於點頭.哈哈~

四月二十四號訓到死魚咁,邊度都唔想去.連續去咗三日東京,人好傷,個銀包仲傷!!!呢日應承咗要去儍馬姨兼職間超市接儍馬姨收工跟住去波子機舖睇台.六點幾兩條死魚拖住去搵儍馬姨.買咗啲餸,等咗儍馬姨成個鍾,跟住一齊去睇台.返到屋企煮個飯仔食.好在咁耐冇煮都仲食得下...只係唔識落鹽o既份量...

四月二十五號儍馬自己一個出東京.去交錢租屋唔使兩個人,慳返啲車錢!點知原來記錯咗時間遲大到,結果儍馬等咗三個鍾,返到屋企勁嬲呀!好在冇喺條街發脾氣...

四月二十六號走咗去附近超市買餸煮飯仔.呢日儍魚整咗肉骨茶.儍馬姨都話好味...

四月二十七號出咗去東京做行街紙,上下網,睇下嘢,格下價.俾儍馬話儍魚買埋晒啲貴嘢...

四月二十八號一早俾儍馬姨拉咗去波子機舖.打咗一陣儍魚首先中個大o既,有錢贏.跟住到儍馬連續中咗三個大o既.儍馬姨都有中,不過係兩個細o既,輸錢...儍馬姨見儍馬贏錢,自己又就o黎要去返兼職,所以就赶咗儍馬同儍魚返屋企.點知返到屋企冇幾耐儍馬姨打返屋企話儍魚坐嗰台之後連中咗十七個大嘢!!!儍馬聽到面色即刻變晒...如果繼續打落去,儍魚就會有免費靚雪櫃,靚洗衣機,大液晶電視,等等...不過算喇.好多嘢都係整定o既.可能儍魚繼續打落去係會輸都唔定...儍魚好知足o架!錢啫...夠咪得囉.

四月二十九號搬新屋!!!儍馬拎兩個總共四十三公斤o既大行李加一個背囊,而儍魚就梗係輕啲拎一個十公斤紅白藍袋加兩個旅行袋.儍魚先去拎鎖匙,而儍馬就慢慢抬啲嘢去新屋.拎完鎖匙,擺晒啲行李上新屋,儍魚就去搞埋啲手續,而儍馬就喺新屋抖.跟住煤氣公司o黎開煤氣,檢查個煮食爐同解釋點開個熱水制.之後儍馬又要返去儍馬姨度拎埋其他行李.儍魚等儍馬走咗之後執咗陣嘢,然後出去買窗簾,床舖(其實上網買咗但係因為假期送唔到貨所以求其買住訓幾日),厠紙等日用品.儍馬返千葉前走咗去東京站新開o既新丸行下.結果搞到九點幾至返o黎新屋.儍魚等到個魚肚係咁叫...儍馬抖咗一陣又同儍魚出動去買嘢.買咗個微波烤爐叫送貨,今日中午到.跟住買咗個飯煲,電子熱水壺,日用品同食物等.之後拎住大包細包走去和民食嘢.

四月三十號瘋狂購物!!!買咗電視,雪櫃,洗衣機,飯枱仔,木櫃仔,日用品同其他廚房用品等.因為仲未有雪櫃,所以冇買食物.呢日都係出街食.除咗三件大嘢叫送貨之外,其他都係要自己拎返去.攰到死呀!!!

五月一號儍馬開工.儍魚喺屋企做乜?梗係冇得訓喇!儍魚又做咕哩俾錢買嘢抬返屋企.買咗鑊,煲,木櫃仔,晾衫棍同好多其他林林審審一大堆...拎到儍魚死死下.返到屋企仲要砌兩個木櫃仔,搞到隻右手冇晒力.聽日終於可以留喺屋企等啲洗衣機,電視同床舖送o黎.終於都叫買齊晒啲嘢...但係儍魚就更加憎購物!!!