擺烏龍

今日同傻馬驅車去区役所拎身分證.仲諗住要等好耐,點知唔使十分鍾就搞掂.因為仲想四周圍行下,而其他地方難搵車位,兩架愛驅就咁停喺区役所個駐輪場.跟住魚肚仔好嘈,傻馬又唔知食乜好,行咗一陣諗住食咖哩...

經過呢間舖,傻馬停低望住個價錢牌.望咗一陣,傻馬就行咗入去.

傻馬同傻魚一人嗌咗一個海鮮飯定食.傻魚食到津津有味,傻馬就話冇乜味...其實啲海鮮刺身幾鮮o架!

食飽飽就去銀行開戶口.點知傻馬俾公司啲同事誤導,以為身分證後面會寫埋公司名,所以冇叫公司出信,結果就開唔到戶口喇!傻魚尋日已經提咗傻馬話一定要公司出封信,又唔聽人講...今日開唔到戶口,咪出唔到電話囉!去完銀行,約咗個時間同地點會合,傻馬就搭火車去秋葉原買嘢,而傻魚就去咗逛東急手.逛咗好耐,買咗少少嘢,見仲有半個鍾,跟住就行過去紀伊國屋一邊睇雜誌一邊等傻馬.傻馬拎住一大袋嘢,同傻魚會合後一齊上五樓買電腦書.今日傻馬買咗五本書,用咗萬幾円...點解咁捨得?!!因為公司有津貼囉!傻馬仲問傻魚有冇乜電腦書或商業書想買,記低遲啲再o黎買喎.買完之後睇咗一陣書,跟住就拎住幾廿斤去買餸,然後返屋企喇!

今晚餐飯其實係尋日想整,因為尋日懶去買餸,所以今日至整.今日都仲懶懶地,唔想由牛油,麵粉開始整起,但係又想食白汁喎,咪拎咗盒白汁磚出o黎用囉...試味嗰陣,發現點解怪怪地o既...唔理喇...都好好味呀!!!

食到一半,唔知黐咗邊條線,突然走咗去開雪櫃拎盒白汁磚出o黎睇...原來傻魚擺咗個大烏龍...之前去超市諗住買白汁磚,點知買咗盒白咖哩磚!!!結果今晚唔係食什菜白汁雞飯,而係什菜白咖哩雞飯...哈哈哈~