晚餐

今日儍馬喺公司冇嘢做上網睇咗好多部落格.放工返到屋企見到儍魚個部落格,突然話儍魚個部落格啲網誌分類名稱太奇怪.如果有人o黎到想睇某一類別會唔知去邊睇好,吸引唔到啲人繼續返o黎睇...儍馬叫儍魚改改啲名,咁啱儍魚都想執一執,咪好聽話咁改晒啲網誌分類名稱囉...

講返正題...o黎咗日本之後,每日最頭痛就係晚餐唔知整乜食好...以前有奶奶煮,間唔中想食某啲嘢,只要話俾奶奶聽,嗰晚就會有得食.幾幸福呀!!!上個星期去買餸嗰陣,因為懶,諗住一次過買多啲唔使日日出去買.終於搞到個雪櫃爆咗幾日之外,仲搞到有啲材料要送入垃圾桶...兩人份量真係好難買...

前日,整咗一大煲咖哩薯仔雞翼.當然係一次過食唔晒喇.留返一半尋晚食.儍魚一向唔食隔夜餸...(儍魚好富貴o架!!!以前屋企從來都唔會有隔夜餸...)咁咪唯有出街去超市買紅蘿蔔同茄子,但係就唔記得買西蘭花...

加啲紅蘿蔔同茄子,味道有少少唔同咗,又當係新整o既晚餐...不過少咗啲綠色,唔夠靚.今晚食啲乜???

咪就係呢個煲咗幾個鍾o既黑椒豬肚排骨...湯?!!儍馬當湯咁飲,咁唯有當係湯囉...今餐儍馬食飯o既速度快好鬼多,就係因為呢個黑椒湯.聽日要焗返杯花旗參俾儍馬飲至得...

凈係食豬肚排骨好似太多肉.見到雪櫃有包買咗幾日o既芽菜,成磚蒟蒻,半磚炸豆腐同幾塊魚餅喎.費時又益咗個垃圾桶,咪拎出o黎切絲用XO醬乾炒囉.XO醬梗係好好味喇!!!終於都清咗啲舊食材...聽日又要出去超市買餸喇!!!聽晚食乜好?唔諗喇!聽日訓醒至算喇...