今日儍馬興致勃勃咁同儍魚去咗月島.儍馬之前已經講過好多次話要去月島食もんじゃ(monja),因為月島係もんじゃo既發源地.もんじゃ係日式燒餅お好み焼き(okonomiyaki)o既同黨,都係嗰類嘢.儍馬好期待咁走咗入一間都幾多客o既店.儍魚就唔係咁大興趣,因為以前食過覺得麻麻.儍馬叫咗個海鮮もんじゃ同波子滊水...
靚女店員姐姐擺低呢碗嘢,跟住就開爐等個鐵板熱.
等咗一陣,塊鐵板都仲未熱,個姐姐仔已經等唔切落油跟住倒咗啲海鮮落去炒...而隔離枱個叔叔就好俾心機咁幫個客整,比較下個姐姐仔好似冇咁專業.
隔離枱個叔叔炒完啲海鮮會拎起擺喺隻碟度,跟住清一清塊鐵板再落油去炒啲椰菜,但係呢個姐姐仔就冇咁做.佢將啲海鮮求其推去一邊跟住就倒啲椰菜落去炒.
喺個姐姐仔倒汁o既時候塊鐵板至開以夠熱...真係吹漲...個姐姐仔真係好似想快啲走咁...可能係俾儍馬同儍魚係咁睇住,所以個姐姐仔覺得唔係咁舒服啩...咁人哋外國人第一次食未見過係咁o架喇...
最後個姐姐仔問要唔要落青紫菜碎,但係儍馬就聽唔到佢問乜.可想而知個姐姐仔有幾求其喇.之後個姐姐仔關細少少個火就行開咗.反而係幫隔離枱整嗰位叔叔夠醒目,走過o黎將個火關到最細.食完儍馬都有少少失望.冇預期咁好味之餘仲要係食唔飽...相信儍馬以後都唔會再嘈住話要食もんじゃ喇!
食完兩條友就漫步行去豊洲個La La Port.走咗入一間好大o既超市,俾儍馬見到有鰹魚試食喎.儍馬忍唔住走咗去試咗幾件,而儍魚就懶得理儍馬,走咗去睇啲生果.結果只係幫襯買咗兩包儍魚成日都搵o既豆豆零食就走人去行第二座.行到咁上下兩條友都攰到唔想再行,個肚仔又覺餓餓地咪搵嘢食囉.見到儍魚好鍾意食o既蛋包飯喎.但係儍馬話想食拉麵,咪同儍馬去搵拉麵囉...心諗o黎咗日本咁耐都未食過,今次又冇得食蛋包飯喇...可能儍馬感覺到儍魚好失望,加上啲拉麵賣相麻麻,最終都如儍魚所望去食蛋包飯!!!
呢間店可能喺渋谷都有...因為個店名下面寫住渋谷...下次去渋谷時搵搵先...
儍馬叫咗呢個...儍馬話好味喎...
儍魚就叫咗呢個...好好味呀!!!
食完行多一陣,買兩個蛋卷仔就去咗儍馬個朋友屋企度拎o黎日本之前寄o既包裹.請咗朋友仔食蛋卷,不過梗係有留返一個俾自己喇.朋友仔有隻狗仔好得意o架...
同呢隻得意狗仔玩咗一陣就抬住十四公斤返屋企.返到屋企個車站,儍馬已經筋疲力竭.儍魚唯有飛奔返屋企,擺低手上啲嘢,跟住九秒九飛單車出去接儍馬.返到屋企兩條友都散晒...沖完個涼仔,兩條友坐喺度邊睇電視仔邊食蛋卷仔!舒服!!!舒服!!!咁,又一日喇!!!
沒有留言:
發佈留言