人物介紹@關生

邊個係關生?好多人都睇到一頭霧水...關生其實係儍馬由細玩到大o既其中一個死黨.雖然中學時期少咗一齊玩,之後關生仲去埋美國讀書,但係儍馬同關生都仲係好老友鬼鬼.儍馬喺日本讀完書返香港之後冇幾耐,關生都回流返香港做嘢.之後又再開始一齊行街食飯.

關生份人好鬼搞笑o架!成日用自己識得o既少少日文創造自己獨有o既新名詞.識日文o既香港人會覺得好搞笑囉.例如:西面(粗口)關生會講"nishi men", 勁忙係咁做係"怒(ikari)做", 卵樣(粗口)係"tamago sama"等等...仲有好多新名詞,儍魚一時之間都諗唔起...總之見一次就會有一個新名詞.而喺儍馬個手提裡面,關生係叫"kuso",即係好臭咁解...

點解會整編咖哩俾關生?因為咖哩係關生o既大好物.關生曾經試過同兩位朋友仔一齊去日本遊行,連續幾日三餐都係食咖哩...搞到其中一位朋友仔以後都唔敢再同關生一齊去日本旅行.七月頭關生會同一位志同道合o既朋友仔去沖繩玩.到時會經東京o黎滾搞下儍馬同儍魚...儍馬好期待呢位老友o既來訪.儍魚就四周圍睇下啲咖哩店,到時同關生餐餐去唔同咖哩店食.咁咪唔怕悶又可以試下邊間好食啲.

關生啲私人嘢就唔講咁多喇.關生份工成日要飛o黎飛去,所以成日都話識唔到女朋友仔.近排終於識到個女朋友仔喇!但係個女朋友仔身在美國,距離好遠下喎...關生一年都會飛十幾次美國,最快月尾會見到面喇!見關生依家咁,儍馬同儍魚都好開心.希望關生可以早日介紹阿關太俾儍馬同儍魚識.放心喎!!!儍馬到時一定會做"鄧穿石".儍馬頂唔到酒咪儍魚幫關生頂囉!!!