三不思議事件

搬咗入o黎呢間屋,都有十日喇...除咗入口冇門鍾呢一大不思議事件外,仲有其他兩件事係儍魚點都諗唔通...第二不思議事件係住三樓個男人竟然喺樓下屋主間屋自由出入!但係好明顯兩家係唔同姓o既...唔通係親戚?!!第三不思議事件係最奇怪o既一件事...住咗咁耐,儍馬同儍魚都從來未見過隔離屋個隣居.起初以為係冇人住,因為隔離屋從來都唔關門.但係有日夜晚出街見到隔離屋玄關有對拖鞋,而由露台望入去係有燈光.好明顯係有人住...儍馬之前仲諗住八卦想入屋睇下隔離間屋啲間隔係咪一樣.好在冇咋!雖然話個入口有密碼鎖,都唔可以成日開住個門o架...儍魚喺度諗,會唔會係成棟樓除咗儍馬儍魚,其實個個都係親戚呢?!!

講開樓上個男人,佢好鬼搞笑...話說上個星期五晚,儍馬同儍魚鬼祟丟垃圾時遇到樓上個男人.(其實係怕第二朝起唔到身丟垃圾要等多一個星期,所以半夜走去丟...其實係唔可以咁做o既...)個男人之後走咗上樓,跟住又跑落樓叫住儍魚.儍魚心諗,死喇...俾人鬧喇...點知佢問儍魚食唔食芝士蛋糕條,仲俾咗兩個味儍魚揀...咁儍魚咪揀咗條藍梅芝士條,跟住咪不停咁多謝佢囉.就係嗰日佢喺儍魚面前開門入屋主間屋.第二日儍馬同儍魚去一日遊,夜晚返到屋企見到門口掛咗袋嘢.拎返入屋一睇,係兩罐啤酒同一張紙條.原來之前嗰日樓上個男人請儍魚食嗰條芝士蛋糕條過咗期,但係佢唔知請咗儍魚食.到佢自己食埋另一條嗰陣至發現,所以送咗兩罐啤酒陪罪.搞到儍魚好唔好意思...要諗諗應該請返人食乜...有冇人有好提意?