樣樣都好味!

今日落咗成日雨,傻魚坐喺露台窗邊望咗成個鍾頭雨,好鬼悠閒!!!見老天爺仲未喊夠,咪提早出去買餸囉.落雨冇得驅車,慢步行去超市.一時唔記得今日冇車,買咗一大堆嘢,拎到死死下...今晚食啲乜?見到雪櫃有好多炸菜,前幾日買o既豆腐同兩個玉子豆腐,諗咗好耐至諗到點整.跟住就去超市買咗包肉碎.

整咗個炸菜肉餅蒸兩色豆腐同味噌湯,加埋前日傻馬食凈半包泡芽菜同尋日買o既超低長腳蟹,今晚餐飯好豐富.食食下傻馬無端端講咗句:「樣樣都好好味!!!」梗係好味喇!今日唔使自己拆蟹食喎!樣樣都係傻馬鍾意食o既,點會唔好味...