神田半日遊

今日係母親節,一心諗住留喺屋企好好利用個部落格,慢慢寫編網誌俾儍媽.點知儍馬早過儍魚起身,仲不停嘈醒儍魚話要去神田睇祭典...儍魚咪唯有死死氣地起身,求其食幾塊餅仔就跟儍馬出門.途中悶悶地當然不忘送個短訊俾奶奶同奶奶講聲母親節快樂喇!一行出御茶ノ水站就見到好多人跟住一堆抬住お神輿o既人.儍馬好忙不停影相,而儍魚就做跟得一路跟住...啲人...哈哈~

有男有女,大家輪流抬一段路.一邊抬一邊嗌住個口號,腳步隨著口號一左一右好整齊.

行到靖國通同明大通/千代田通個大十字路口,就見到有人搬咗個壇去路中間,跟住就見到另外三座お神輿集合.四座お神輿圍住個壇轉咗兩圈,跟住就停喺中間個壇度.壇上邊個主持用大聲公講咗幾句嘢,之後四座お神輿又再圈住個壇係咁轉.原本儍馬有用部數碼相機拍短片,點知喺最重要關頭竟然冇位喎...結果唔可以俾大家睇睇當時嗰個場面.

場中見到好多冇着褲o既男人...身邊有個韓國女人不停望住其中一個男人係咁笑...跟住四座お神輿分開散去.行行下俾儍馬見到至愛o既吞拿魚飯專門店,諗都唔諗就走咗入去食.

儍馬叫咗呢個マグロ丼.不過儍馬話啲吞拿魚冇乜味喎...

儍魚叫咗呢個漁師風ぶっかけ丼,啲吞拿魚一般新鮮喇...

食完儍馬就帶住儍魚漫步去後樂園.

喺後樂園某個商場地面噴水池四周圍見到好多易服老友仔...儍馬走咗去影啲人...跟住行咗一陣商場就搭車返屋企.夜晚整咗五成熟黑椒牛扒飯俾儍馬食,而自己就整咗個黑椒雞扒飯食.由於好攰冇整啲綠色嘢食,個賣相唔靚所以冇影相.下次喇!儍馬話好好味,所以一定會再整...

最後要祝天下間所有媽咪: 母親節快樂!!!

後註: 因為奶奶唔係好識按個短訊出o黎睇,所以之後儍魚又送咗個短訊俾老爺.後來儍魚打返屋企至知奶奶今日上咗大陸,要夜啲至返.儍馬個公司手提又咁啱冇電,結果今日儍馬冇同奶奶傾到偈.儍魚o既一偏苦心就咁冇咗喇!聽日奶奶實會打o黎搵儍馬.不過就冇咗個意義...