一日遊

難得放假,儍馬梗係想出去玩下.奈何新屋仲有嘢未搞掂,結果就咁冇咗兩日假.今日終於都可以真正放假,尋晚儍馬就講要同儍魚去鎌倉江之島一日遊.結果今朝儍魚因為唔舒服,訓遲咗...去到江之島已經一點幾...儍馬驚去到江之島搵唔到嘢食,途中走咗入一間拉麵店填肚.當然,咁多人去o既地方又點會冇嘢食o架?!!

原來今日係兒童節...唔怪得知成街都係親子團喇...

好多屋台小食,但係啲人仲多...

打晒蛇餅,前面排咗兩對老人家帶住三個細路.啲細路嘈到儍魚對耳就聾.上到去啲風大到吹得走人...

係咁上斜落斜,行到儍魚對腳軟晒...唔係講笑,真係發晒軟蹄差啲企都冇力...

儍馬睇浪睇到唔捨得走...結果個天開始黑,想去其他地方都唔得...原定去完江之島去鎌倉,見個天都黑埋咪唯有等下次囉...儍馬心有不甘咁搭車返屋企...

因為儍魚真係好攰好唔舒服,所以今晚決定唔出街食,返屋企煮飯仔.奶奶唔喺度,就梗係儍魚做大廚喇!兩人份量真係好難煮...想煮多個餸但係又會食唔晒...可能病咗,味覺失靈.個XO醬蒟蒻白菜金菇炒肉碎差少少鹽,但係個洋蔥炒蛋就好好味.跟住落o黎幾日都會食蒟蒻...因為貪平買咗包業務用o既大蒟蒻...儍馬話唔緊要,因為儍馬鍾意食...儍魚個頭就大晒,因為要諗點樣煮...