淺草三社祭

上個星期六去咗個神田祭,補充返少少資料先.神田祭,俗稱江戶之華「天下祭」,每兩年至會舉行一次.今年咁啱俾係傻馬發現咗,咪走去湊熱鬧囉.今日星期六,傻馬又帶傻魚去湊另一個熱鬧 - 淺草神社o既三社祭.呢個三社祭一連舉行四日,今日係第三日.所以有興趣o既朋友聽日可以去睇睇,但係就要早起身.因為聽日喺朝早六點鍾開始.由於太早起唔到身,所以傻馬同傻魚聽日就唔去喇!

點解又提返上個星期六o既神田祭?因為神田祭同今日呢個淺草神社三社祭,仲有另一個喺八月,但係每三年至會舉行一次,咁啱今年冇o既深川八幡祭,被稱為江戶三大祭.三大祭去咗兩個,梗係會去埋第三個喇!傻馬依家正好努力咁搵緊深川入幡祭o既時間表,睇下明年會唔會舉行.

講返呢個三社祭,係全日本最多神輿o既祭典.今日大大細細加埋大概有一百台神輿參與.上年o黎參觀o既人多逹一百五十萬人!!!今日啲人由雷門塞到入神社裡面.想參拜o既信徒都要幾經艱辛至入到神社.傻馬同傻魚好辛苦至迫到去淺草神社門口,傻馬搵咗個靚位影咗好多相...

喺淺草神社門口影o既...睇下呢片人海,幾恐怖呀!!!傻馬同傻魚就係喺呢片人海之中游過o黎...諗起都覺辛苦...

今日除咗有好多冇着褲o既男人之外,仲多咗呢幾個紋身"裸"男...以傻魚所見,呢台係眾多台神輿中最大o既一台.仲要係嗌得最大聲,最"嘈"o既一台...

加返條片先...睇下個場面幾咁"虛憾"...其實當局一早已經俾定張同意書啲參與者簽,講明唔可以有人企喺神輿上面,免得引起觀眾起哄騷亂而發生不必要o既意外.不過都唔係全部日本人都係咁聽話o既...

紋身"裸"男嗰台過咗之後,傻馬見身邊啲人走晒,諗住散得場,咪拉住傻魚兜去神社後面走.點知原來啲神輿排晒係神社後面等出發喎...見冇乜人圍觀,傻馬即刻呻笨,話早知o黎呢度睇唔使同人迫得咁辛苦...咁啱最後一批開始出發,傻馬梗係即刻搵個正位超近距離影相.

除咗啲大人抬大神輿,連小朋友都有個細o既神輿抬.有啲細路好細個,得兩三歲,好得意...

睇咗一陣傻魚個魚肚係咁狂叫喎.咪走咗去啲屋台買咗碟日式燒餅食,頂住先...睇完已經超攰,諗住終於可以返屋企...點知傻馬話要去秋葉原搵嘢喎...咪"又"唯有跟埋去囉...行行下,真係好攰頂唔順喇...傻馬見傻魚咁辛苦咪叫傻魚自己返屋企先囉.返到屋企抖咗十五分鍾,又要開工係咁切絲喇!喺傻魚整緊酸辣湯嗰陣傻馬神神秘秘咁返o黎,俾咗袋嘢傻魚...打開一睇...

嘩~!!!好得意o既熊仔呀!!!唔?!!罐裡面係朱古力?!!咪俾傻馬食囉...因為傻魚唔鍾意食甜嘢...依家係咁望住隻熊仔,超開心呀!!!傻魚係咪好易氹呢?!!