謎底

做乜搞到咁"早"至上o黎開估?梗係又關傻馬事喇!今日儍馬咁闊佬同傻魚出街食飯係因為尋晚夜返餓親傻魚,所以今日就唔使傻魚煮飯喇!出到去都唔知食乜好...行到新宿四周圍望下,最終傻馬話不如去食迴転寿司.原本傻魚諗住去返之前去過嗰間,但係傻馬話想試下另一間.呢間迴転寿司之前經過幾次,儍魚唔使入過去都知間店麻麻地...傻馬唔聽人講,咪由傻馬去試囉.入到去一坐低凈係見到啲寿司喺度轉,但就唔見有師父喺度握.間店啲師父全部都喺客人見唔到o既地方握完放上條迴轉帶...咁o既環境見到都唔係咁開胃...傻馬求其拎咗幾碟,而傻魚就特別叫師父另整,因為傻魚唔食山葵.

傻馬最愛o既海膽...賣相完全唔得!一睇就知唔新鮮...

傻魚最愛o既鰻魚...賣相都係麻麻,好在都幾好味...

傻馬拎咗碟不知名物體o黎食,仲問傻魚呢個係乜...傻魚點知喎...傻魚都係第一次見咋...傻馬食完冇出聲,啫係唔好食喇...傻魚仲食咗帶子,中拖羅.而傻馬就另外仲食咗吞拿魚,墨魚.仲有幾樣唔記係乜.總之就唔係食咗好多嘢.埋單二千五百二十六円,咁o既質素算貴喇.

食完,唔係好飽,諗住返屋企睇電視.點知傻馬話要去打機喎...咁傻魚咪唯有跟埋去囉...一打就三個幾鍾.就係咁,傻馬尋日嬴咗啲錢使晒喇!返到屋企個肚有啲餓,咁咪煮嘢食囉!

係呀!!!謎低係海鮮冬陰公湯呀!!!諗住煮完即刻影低跟住就擺上o黎,點知傻馬拎咗張無線上網卡駁返公司睇公司部機啲嘢...就咁傻魚呆等咗兩個鍾冇得上網...傻馬依家喺邊?去咗溝周家千金囉...