戲劇人生: 7月 2008

2008年7月31日星期四

百感交集

今日繼續搬竇,一路搬一路睇.睇返以前啲網誌,真係百感交集.原來發生過咁多事...有好多事已經唔記得,特別係唔開心嗰啲.依家睇返好感觸.好多人與事都唔同晒,連自己o既心態都變咗好多.希望係變好唔係變壞...
見坐到屎忽痛,就起身換衫驅車去"企鵝仔".一係唔買,一買就買咗六千円...勁!!!買乜?日用品呀,零食呀,即食麵呀,汽水呀咁...拎住兩大袋嘢離開,驅車去便利店買便當做晚餐.

飯後甜品係喺"企鵝仔"買o既紅茶蛋糕卷,甜咗啲...喺傻家吽咗兩日,聽日要出街行下至得...

2008年7月30日星期三

搬竇

出咗幾日街,今日喺傻家抖下回復下啲元氣先.難得一日得閒靜落o黎,但係硬係唔知想點咁...上上下網,終於搵到啲世藝喇...見呢度成日都神神地,冇啦啦會唔見嘢,所以將啲網誌抄去另一度做後備以防萬一.抄到頭暈眼花,唔覺唔覺又差唔到七點...弊!!!唔記得去買餸添...唉~算喇...傻家仲有好多"後備食糧",唔會冇飯食o既...

網友甲君介紹o既正牛扒.輕輕煎一煎,傻馬激讚!!!

冇去買餸,冇雞扒食,唯有食午餐肉囉...聽日傻馬返好晏收好夜,傻魚要食自己...一條友都係求其煮個麵算o架喇...又唔使去買餸,幾好呀...呵~

2008年7月29日星期二

今朝好早就起咗身,因為約咗網友可可同囡囡.喺品川會合網友可可之後就一齊搭的士去入管攞簽證,可惜網友可可唔記得帶護照,結果白行...返到品川駅就先去食嘢,然後再搭電車去錦糸町行街街.囡囡其實已經開始眼瞓,但係有嘢玩,又有人玩,又點捨得瞓呀...行到三點幾,網友可可就話要返歸喇.一上到電車,囡囡就瞓著咗.可想而知囡囡有幾攰...
同網友可可分咗手之後,傻魚唔係返傻家.今晚約咗傻馬去睇表演.乜表演?咪又係傻馬個客囉...繼上次首演之後,今晚又有排演.四點半去到舞浜,傻馬都仲未收工...周圍蕩下游下,等到六點鍾傻馬收工諗住一齊去食嘢.但係傻馬話唔夠時間,遲咗冇得入場喎...咁點呀?睇完至食會餓死o架...冇計...去買個包喺中場休息嗰陣食,頂下都好...六點九開始入場...

今次坐得仲遠...好在準時開場,個表演比上次完整好多.

今次請多咗好多人o黎睇...應該多過上次成倍.客人反應都好好,個表演都幾流暢.完場嗰陣係全場觀眾企晒起身狂拍手掌狂嗌.睇完十點幾,返到傻家都已經係十一點半.乍乍林煮個麵畀傻馬食,然後傻魚就黐住部腦係咁打打打...呢個表演,遲啲應該仲會有機會睇多次.不過傻馬話已經睇到厭晒...點同啫...傻馬日日係咁睇住啲人練習,梗係厭喇...傻魚仲想睇多次最完整o既版本,然之後去澳門睇埋咁就完美喇~哈!
後記: 有興趣o既朋友可以喺 http://www.zed.co.jp/home.php 睇睇.仲未公演,不過有飛買o架喇~

2008年7月28日星期一

分豬肉

今朝一起身醒起要打電話叫啲運輸再送啲嘢o黎.即刻打咗個電話畀"黑貓",個哥哥仔話一個鍾頭內到.收咗線之後再打畀"佐川",呢個哥哥仔就唔多掂,竟然急急腳話忙,話轉頭覆傻魚然後即"斷線"...傻魚揸住個電話"噢"晒嘴...之後收到阿"佐川哥"個電話,話會喺一點前送到.半個鍾後就收到"黑貓哥"個電話,叫傻魚落樓收嘢.原來阿"黑貓哥"今朝o黎過...第一次派冇人收,之後連續派三日,服務唔錯.反觀阿"佐川哥",遲咗四個字到之餘,個箱仲係爛爛地...所以話,平嘢冇好嘢係絕對啱o既...
收完嘢就即刻開箱執嘢拆衣架,再轉個細箱然後封箱拎去寄.阿"佐川哥"遲到,搞到傻魚啲時間亂晒.約咗網友甲君食晏o架嘛...寄完嘢乍乍林快步行去搵網友甲君,然後一齊行去新宿駅上面新開o既餐廳搵食.揀咗間食意粉...

傻魚個沙律...唔記得帶相機,唯有用電話影...電話個鏡頭污糟,朦咗都唔知...失敗~

網友甲君個沙律?前菜?

兩條友嗌咗同一款意粉,蒸雞枝豆白味噌忌廉意粉.味道唔錯.
食完晏就去行街街,喺三百円店買咗啲袜仔同手套畀奶奶.行到咁上下就一齊去買餸.途經韓國超市,見到大大個冬瓜好鬼平喎.兩條友即刻揀個兩份分.之後又見到啲紅蘿蔔好平,又買o黎分.去到平時去開間超市買咗嚿豬肉,然後各自買啲菜,再去"牛牛"買牛肉...搏晒老命狂買,重到差啲拎唔到.買完就上去網友甲君度"分豬肉"同冬瓜~哈!諗起都覺得好搞笑...

用咗四份一個冬瓜煲湯.個鹽燒鮎雖然好味,但都係唔及出面用炭燒嗰啲.都係喺街食算喇...起碼唔使搞啱多嘢,又要清內臟,麻鬼煩...聽日又約咗另一個網友同囡囡去街,夜晚又有表演睇..."又"唔使煮飯,幾過癮呀!嘻~

2008年7月27日星期日

羽村夏祭

傻馬尋晚話今日冇街去.點知喺食晏前突然話有祭睇,叫傻魚快啲換衫.好肚餓添o架..幾耐到呀?今日又去掃街?

去到竟然落雨喎...咁會唔會取消o架?未夠鍾,好肚餓,但又唔想掃街...

見到咖哩店,殺!!!

傻魚個炸雞雞絲咖哩,好好味~

傻馬個炸豬扒芝士咖哩.食食下啲雨停咗,跟住個祭就鍾開始.

有夏威夷舞表演.

睇完表演就周圍行下...好多雞丸...

同胞都o黎湊熱鬧...

好似好好味,可惜好飽唔想食...

街尾有個高台仔,有個小妹妹跳緊日本啲傳統舞...

另一條街尾就有個細路表演...

阿嬸好"性感"呀!!!

阿叔好"妖"下...

呢個姐姐仔好搞笑...

行行下見到有遊行...

嘩~好多性感姐姐跳緊森巴舞呀!!!

睇樣應該係大學生...

跟住遊行隊伍行返駅個台度,等咗一陣又有表演...

今日個祭咁得意o既...

同遊行班大學生比,真係好睇好多...

跳完o黎個大合照...當中有兩位係專程由巴西請o黎表演o既...原本有條片想放上o黎,但係等緊都唔見...唯有遲少少再加返囉...睇到差唔多七點就走人...

今日喺咁不停落雨停雨再落大雨,臨走喺月台度望到個天好紅...返到新宿就去超市買餸...

傻馬見到有鯵魚賣,二話不說就擺入個購物籃度...返到傻家,傻魚差啲畀啲魚玩死...

天氣熱冇乜胃口,所以整冬瓜湯飯食.快靚正呀!嘻~

2008年7月26日星期六

2008年度隅田川花火大会

今日原本約埋網友媽咪一家一齊去"踩人",可惜小朋友唔舒服,所以網友媽咪就打o黎話去唔到喇.好可惜呀!不過唔緊要,電視有直播.諗住早啲出門口去霸返個靚位,結果搞到四點幾至起程...喺上野轉地鐵嗰陣要排隊入閘,多人到咁真係第一次...

去到淺草已經一街都係人...

所有靚位都畀人霸晒...有啲人喺中午點幾鍾就舖定席...冇位咁點算?再行遠少少囉...

終於搵到個靚位,不過就冇得坐要企.

七點二,開始喇~開始喇~

嘩~

嘩嘩嘩~(周圍啲人狂拍手...)

個靚位雖然可以睇得好清楚,但係啲風係迎面吹o黎,所以每次連放幾廿發之後都會畀啲煙遮住睇唔到...

由於好近o既關係,全程都有啲炸藥碎同紙碎從天而降.結果咪成頭都係,連件衫都搞到黑黑地囉...下次一定要記住唔好着白色衫去睇煙花.個半鍾話咁快就完,散場嗰陣仲虛憾...啲人係咁湧去搭地鐵.傻馬就提議行下等啲人流散咁啲至走.雖然傻魚好攰,但係都好過要同人迫車咁辛苦.返到傻家都成十點幾,即刻煲落煲綠豆沙,然後就煎埋啲雞扒同西冷牛扒.o黎緊仲有好多花火大会,要好好準備下至得...