つぼ八居酒屋

出完遊梗係多嘢做...尋晚一返到傻家就即刻洗咗一機衫,今日又洗多機,終於洗晒啲臭衫喇.執下屋,睇下電視,然後諗住早少少去買餸.點知傻馬話收工要去書店買書,叫傻魚驅車去會合.咁啫係話又唔使煮喇...太好喇~
七點幾去到書店同傻馬會合,然後照單執書.行咗陣睇下有乜新書,之後就諗食乜好...周圍行下,見到有間居酒屋有鹽燒鮎食,就呢間喇...

原來係つぼ八居酒屋...之前都o黎過,不過就冇乜印象.睇o黎好似轉咗新形象喎...唔錯唔錯~

裝修都轉埋...

今日咁熱就梗係o黎杯"鬼佬涼茶"喇~傻馬飲咖啡酒奶...

炸砂肝...辣辣地...傻馬食晒,因為傻魚唔多好內臟...

炸"魚翅"...哈~好脆,正!!!

炸雞...傻馬話傻魚鍾意食,所以死都要嗌...

一啲都唔活...o黎到已經唔識郁...不過都幾好味...

呢個味噌芝士雞扒,啲味噌甜咗啲...大部份都係熱氣嘢,傻馬有心靠害...最想食o既鹽燒鮎,今日竟然冇喎...激死~
食飽就去鞋舖,傻馬買咗對鞋,聽日着新鞋返工...真開心~返到傻家一開燈就見到"小強"!!!傻馬即刻發晒茅係咁追住"小強"喊打喊殺.不過隻"小強"好堅,一轉眼就唔見咗.傻馬死心不熄,最後"小強"當然係"腸穿肚爛"喇...就咁畀隻"小強"玩咗成個鍾.隻"小強"應該係趁傻魚開咗露台個門晾衫嗰陣走咗入屋,應該冇同黨...
搞到身水身汗,梗係沖個靚涼先喇...到傻魚沖緊嗰陣,傻馬突然狂拍門...乜事呀?傻馬話地震,問傻魚感唔感覺到.
傻魚:「冇呀...唔覺喎...」
傻馬:「唔係呢,真係好震下喎...杯茶都震得幾勁下.」
傻魚:「係咩?(伸個魚頭仔出去裝下)係喎...點解喺浴室一啲都唔覺震o既?」
傻馬:「唔知喎...可能個浴室啲避震勁啲啩...」
沖完涼睇電視至知,喺岩手県有六級地震.上網搵咗個圖...

東京係震度2至3,唔算勁.畀傻馬話傻魚唔怕死,地震都仲若無其事咁慢慢沖涼...哈~