前幾日收到保險經紀o既電話,問傻魚喺四月係唔係又撞過架車...吓?!!冇呀!咪嗰次條車房粉腸畀巴士撞嗰一單囉...原來巴士公司寄咗封律師信畀保險公司要求賠償.傻魚就同個經紀講,車房粉腸話過唔會郁傻魚份保險,所以可以唔使理.收咗線之後越諗越唔對路,忍唔住打咗個電話畀車房粉腸問清楚.原來係巴士公司告車房粉腸危險駕駛要求賠償,不過車房粉腸就話唔理巴士公司.但係人哋寄咗封律師信去保險公司喎...咁點先?車房粉腸就話會搞掂,叫傻魚通知保險公司唔使理封信.講講下條粉腸同傻魚講架車喺個幾月前賣咗,不過啲錢要等傻魚返香港嗰陣至畀傻魚,話近排使咗幾萬蚊喎...咁都得?!!賣咗咁耐都唔通知聲,有冇搞錯呀?離晒大譜!!!
知道架車賣咗之後,心情好低落.冇車,傻魚就好似隻冇咗翼o既雀仔咁...遲啲返到香港,夜晚得閒唔可以驅車去沙灘吹海風,唔可以驅車返公司,唔可以順路車埋狗奴才,唔可以喺公司留到半夜至走,唔可以一收到關生電話就去機場接機,唔可以成日去元朗食糖水...冇車就要搭輕鐵去市中心(暈車),搭西鐵轉專巴去嫲嫲度(暈車),唔可以周圍去,成日要搵人載...好鬼唔方便呀!!!唉...如果唔係因為架車舊,加上傻魚又成日唔香港,唔想次次返親去就要拎加車去整完至有得用,傻魚真係唔捨得賣架車.近期之內都唔會買車,要等傻馬搬返香港至會買...關生,你又少咗個司機喇~
沒有留言:
發佈留言