今朝約咗網友媽咪同小朋友,所以好早就起咗身.網友媽咪話介紹新朋友畀傻魚識,今日仲會去滾搞人,咁傻魚冇理由兩手空空上去o架...見咁耐都冇做阿茂,就整個"誠意餅"喇.一個鍾都唔使就搞掂,仲有時間攤凍.可惜臨出門口畀個"照肺令"玩死,搞到遲到要網友媽咪等.真係唔好意思~去到新朋友度即刻o黎個"切餅儀式",好多謝大家咁賞面仲話好味.新朋友有兩位可愛公子,三個人仔差啲反轉間屋.細有細玩,大有大傾,然後就一齊去附近餐廳食晏.傻魚負責抱住小公子,落到樓下行唔夠幾步,小公子就瞓咗.可能係傻肥鯨魚軟綿綿,舒服得滯啩...哈~食完傾咗一陣就散會喇,費時撞啱人哋放工要迫車嘛...
原本今晚傻馬會帶傻魚去睇煙花,但係等得傻馬收工去到,啲煙花都可能放晒,所以就決定唔去喇.咦?!!咪啫係今晚要煮飯?好似好耐都冇開過爐喇.個雪櫃仲冇晒貨添...雖然好熱好攰,但係都要頂硬上去買餸.唔想行咁遠,喺"牛牛"入貨算喇.搵唔到網友甲君講嗰個西冷扒,不過就見到一包三塊西冷扒賣九百三十円.都幾低,就殺佢喇.
三成熟,傻馬激讚!
傻魚就例牌同雞有仇.煮完餐飯,由頭濕到落腳...件衫係有汗滴落地嗰隻...勁!忍住唔開冷氣住,等夜啲至開.慳返啲電費嘛...今日玩得開心得滯,唔記得去撳錢添...聽晚又唔使煮...咁啲西冷扒點算呀?
沒有留言:
發佈留言