避世

呢排唔多想見人,好似避世咁日日留喺傻家.一個星期淨係出去兩次,主要係去買餸,每次都唔會超過三個鍾.唔多想講嘢,因為近排成日開口夾著脷,講多錯多.說者無心聽者有意,引起太多誤會喇.加上成日畀人誤會幫人係有居心,覺得好疲倦.可能現今社會好少人會善意助人不求回報,好多人都抱住賣個人情幫人一次o既心態,所以就覺得其他人都係同樣心態.好人難做...但係,係咪因為咁就唔去幫人呢?好矛盾...傻魚應該做唔到坐視不理,只能盡量唔好咁熱心.
今日收到網友媽咪o既電話,約下個星期食飯.本應係好開心至係,但係一早起身就收到個電話令傻魚好唔開心.咩事同咩人就唔好講喇...費時越描越黑同畀人話傻魚惡人先告狀摶同情...傻魚只想講,天外有天.覺得自己好慘麽?大把人慘過自己.覺得自己好黑仔麽?更加黑仔o既大有人在.甚麼酒肉朋友,有難o既時候就影都唔見...若然平時以真心待人,自然會有真心朋友.真話永遠都係比較難聽.若然想聽好聽o既說話,恕傻魚唔識講大話,講唔出.
呢件事困擾咗傻魚成個月,最擔心o既事今朝終於都發生咗.除咗好失望之外,傻魚都好擔心呢位"朋友".希望"朋友"唔好再鑽牛角尖,凡事睇開啲,咁樣做人就會開心啲.為咗呢件事,傻魚成日困喺傻家諗咗好多嘢...係咪傻魚真係做錯咗?反思多次之後都搵唔到傻魚o既錯失.呢件事已成過去,就讓時間去證明傻魚o既真誠,再諗都係冇用.聽朝瞓醒又係新的一天,無需為唔開心o既事原地踏步.傻魚決定放低件事,做返個快樂傻魚.
諗通之後真係一身輕,舒服晒.即刻摷雪櫃睇下有乜湯包.煲落煲湯之後就諗下晚餐整乜食.雪櫃有好多舊貨要清...有個西蘭花擺咗成個星期,開始變黃...

傻馬見到碟螺片西蘭花,話好似去酒樓食嗰啲咁.食過之後仲話以後唔使去酒樓食呢味餸,氹得傻魚差啲飛上天.嘻~煮完餐飯,成間屋都好熱.結果傻馬驚焗親傻魚,所以開咗個幾鍾冷氣.今個月啲電費實好金喇...