夏威夷風味薄餅麵包...好味到傻馬想食多塊,可惜淨係得返兩塊方包同冇晒菠蘿...尋日睇電視話今日會好熱,仲會落雨喎...咁今日都係唔出街喇...到咗兩點幾都唔見啲雨,傻馬話想出街...諗咗好耐都唔知邊好...就喺呢個時候,地震喎...不過都係好輕微咁搖搖下,電視機頂啲嘢都有移位...傻馬驚傻魚曬親,所以就一條友走咗去附近打波...出門口嗰陣傻馬話最遲八點會返,然後沖個涼就同傻魚出街食飯.傻魚一條魚喺傻家冇嘢做,隻左眼又唔多舒服,再加上食咗感冒藥,所以瞓咗一陣...瞓醒,仲大鑊!!!隻眼紅到成隻兔仔眼咁...滴完眼藥水都係冇用,睇嘢濛濛地,仲間唔中有啲"不明物體"添...之前都試過,可能係感染咗細菌啩...即刻除對隱形眼鏡出o黎,做住四眼傻魚先囉...希望聽日冇事喇...
傻馬成八點半至返到.等傻馬沖埋個涼之後就一齊驅車去附近食傻馬好耐都冇食o既河豚.之前去開嗰間次次都好爆,一係等好耐,一係食第二啲收場...原來喺對面街(斜對面)仲有另一間分店,今日就喺去咗呢間.好少人,好舒服...例牌o黎個套餐,唔使諗食乜...
一人叫咗一杯嘢食,傻馬嗰杯西柚"沙華"好難飲...傻馬飲咗兩啖就話好似醉醉地,可能係運動完易上腦...結果傻魚飲晒兩杯...
之前食開嗰間會將二人份o既河豚刺身一碟上,呢間就一人一碟咁上.感覺上好似多咗...哈~點柚子醋,勁好味!
擺低嗰陣啲河豚仲識郁o架...食咗咁多次,都唔使人教就自動波將有骨o既先擺入紙鍋煮三分鍾.好味!!!
呢味係傻魚至愛...好味到想食埋傻馬嗰份...
最後o黎個雜炊.梗係由專人炮製喇.可能係冇乜客,個哥哥仔好有心機整.好味~
甜品就一般喇...食完順路去便利店買方包,然後就返歸喇...今餐食咗一萬二千三百七十円...貴...返到傻家一入屋...嘩~間屋好焗呀!!!終於頂唔順要開冷氣,今個月電費實好金...電費又起價...唉~
同場加映:
由於關生想搵返之前喺蟹道樂飲過好味o既柚子酒,傻魚次次經過賣酒o既地方都會睇下有冇.早排見到...
買o黎試下...不過都係冇嗰杯咁好飲...再搵下先...關生,如果傻魚搵到,一定會帶返支畀你!
備註: とらふぐ亭 (http://www.torafugu.co.jp/)
沒有留言:
發佈留言