咖啡廳

今朝起身食完個"砵蘭池"之後,終於頂唔順捉住傻馬一齊大掃除.今日鬼死咁熱,晾完衫已經輕微濕身...開始執嘢嗰陣就好似置身於桑拿室咁,啲汗不受控制係咁流.都唔知執咗有冇半個鍾,成件衫已經濕晒...勁...如果咁樣可以瘦幾磅就好喇...傻馬見傻魚成隻落湯雞咁,就話不如開一陣冷氣...傻魚即刻話唔使,電費又唔係免費.執咗四個幾鍾,終於搞掂晒!夜啲去"企鵝仔"買埋張凳就可以收工.原本諗住去"牛牛"買西冷扒整西餐,不過傻馬見傻魚淨返半條命都冇,就話要出街食...死喇...傻馬畀傻魚教壞晒,使錢越o黎越"狼死"喇...
出咗一身汗,個人覺得舒服咗.沖完個涼就驅車去時代廣場高島屋,上十二樓...

就係去呢間食晚餐.唔使等位,好彩...

一人叫一杯奶昔...

啲雞翼辣辣地,幾好味...不過傻魚唔鍾意個芝士醬啲味...

呢個洋蔥環勁正!!!

個雜菌芝士薄餅都唔錯...有好多蒜片,食完個口勁臭!傻魚撥晒啲蒜片畀傻馬...嘻~

招牌漢堡,可以揀要幾成熟.傻馬揀咗五成熟,食完之後突然大嗌:「哎呀!」
傻魚:「做乜呀?」
傻馬:「(望住支介辣醬同番茄醬)唔怪得知個包咁乾喇...原來唔記得落醬呀!!!」
笑鬼死傻魚...兩條友好似生漬咁叫咗四樣嘢,個侍應姐姐落完單之後即刻拉埋隔離張枱畀傻魚用...當然係食得好飽之餘,仲食淨咗一件薄餅...埋單五千三百一十円,可以接受.食完行咗一陣街,然後驅車去"企鵝仔"買咗兩張凳.好嘢!終於唔使喺個地度食飯,可以坐喺張矮枱度食飯喇...哈哈哈~