由於有幾位網友下個星期唔得閒,經商討過後決定今日去唱歌仔.今次總共有八位出席...網友主婦兩公婆,老師主婦兩公婆,網友人類兩公婆,網友姐君同傻魚!陣容鼎盛~
網友夢想成真點名想聽老師主婦唱某首唱,可惜老師主婦冇唱到.但係唔使失望,喺度送上老師主婦兩公婆o既合唱.原本仲有另外三條片,但係檔案太大上載唔到...唯有等其他人上載囉...
唱咗三個半鍾,唔係好夠,不過都要散會轉下場.老師主婦兩公婆要返去接女,網友姐君就要返去煮飯畀"阿味噌湯"食,所以同傻馬會合之後佢哋就返歸喇.凈返六條友轉戰居酒屋!
呢間係海鮮居酒屋,位於新宿歌舞伎町某大夏o既十七樓,門面真係好靚...
因為預約定位,所以攞到個正窗口位.天黑後個夜景都唔錯.
傻馬見新奇,係咁刨鮮山葵...好好玩咁...
生蠔,傻馬同網友主婦都好愛...
魚魚...都幾好味.
比想像中細好多...餐牌張相大好多喎...
例牌梗要o黎一碟...
食咗兩個半鍾,傾到雞啄唔斷唔願走...之後行去新宿站時突然落雨...貴人出門招風雨?!!好期待下一次聚會~
尋日食咗餐勁o既,唔係講笑,真係飽到今日三點幾...落咗成日雨,成個人懶洋洋咁乜都唔多想做.尋日應承傻馬今日要早啲煮飯.傻馬準時七點返到屋企,諗住死火仲有個餸未炒...點知傻馬好開心咁遞咗包嘢畀傻魚話終於忍唔住買返o黎今晚加料喎...早唔買遲唔買,依家唔可以食至o黎買...吹漲!!!係乜?一陣開估...仲諗住大鑊喇,未有飯食傻馬又會去搵零食,跟住到食飯嗰陣又話好飽咁...點知傻馬話要即刻沖個涼先...原來傻馬盤骨位個傷口今日係咁流啲血水出o黎,搞到傻馬今日返工去咗廿幾次廁所搞個傷口...
傻馬今日個午餐...傻魚一睇即刻嗌咗出o黎...傻馬九秒九答話冇食到隻蛋...算傻馬醒目~
傻馬咪就係買咗份韓式燒餅囉...仲要係有蝦同韮菜...死未~結果咪要大工程咁挑晒啲蝦同韮菜出o黎至食...要知道,傻魚都係唔可以食韮菜o架!!!暈~
下午四點半收到傻馬o既電話問傻魚食咗嘢未,肚唔肚餓.傻魚話午餐食咗少少嘢,咁傻馬就話不如出去食嘢囉.原來傻馬今日去個客度所以早收工.約定半個鍾後喺新宿東口間生果店會合,跟住就走咗去食迴転寿司喇.
傻魚至愛~好味!好味!
傻馬話有筋...麻麻地...
傻馬至愛~不過唔多新鮮,溶溶地...
好爽口,好正~
傻馬話食唔到蔥...
傻馬話好味~
傻魚第二至愛~走山葵...好鮮好好味!不過如果再大隻啲就更加正!
走山葵...好味!!!
勁鮮~傻馬食完話下次要早啲叫,食多幾件至得...
非常肥美~入口即溶!!!
埋單兩條友食咗廿一碟,承惠三千四百円!!!差唔多喇...食完就去逛超市.去到超市就梗係又狂買喇...見有咕哩仲唔起勢買咩...買完諗住行返屋企,點知就喺超市地面入口撞到網友姐君喎.咁啱...返到屋企冇幾耐,傻馬就約埋周公子打籃球...打到依家都仲未打完...今日食咗個下午茶晚餐,夜啲傻馬會肚仔餓搵嘢食...一陣整啲乜畀傻馬食好???諗諗先...
尋日,唔知係咪因為前日興奮得滯,加上唔夠訓,偏頭痛咗成日.黐喺張床度,訓又訓唔到,好辛苦...好在天氣唔係熱...食完藥個頭都係咁痛,成晚訓唔到...搞到今朝七點幾,叮完包畀傻馬食之後就暈鬼咗~訓到中午十二點札醒...應該係話熱醒至啱...見咁好太陽,即刻洗咗機衫.尋晚畀傻馬話傻魚成日屈喺屋企發晒霉,今日見要出街買餸,心諗不如搵埋網友姐君一齊去中野囉.見網友姐君在線,即刻約三點半喺中野等.
師奶仔見面梗係又雞啄唔斷喇.介紹完啲好嘢畀網友姐君,買完餸,一人幾袋咁去飲咖啡.平時傻魚係唔飲咖啡o架.不過今日個頭仲有少少唔舒服,咪飲少少麻醉下個腦囉.傾到咁上下時間,一袋二袋咁去搭車.點知太耐冇搭電車去中野,醒唔起東西線都係喺中野開車,朦下朦下帶咗網友姐君上車...到下個站至發覺搭錯車,咋咋林喺再下一個站高田馬場落車再轉山手線返屋企...真係唔好意思呀,網友姐君,又帶人去游車河添...不過有伴一齊去買餸,真係好開心~
返到屋企上網同老師主婦講開唱歌仔,即刻連埋網友主婦同網友姐仔,四個師奶仔在線係咁傾,係咁笑...傾到唔捨得去煮飯...結果今晚遲食飯...
尋晚餐飯仔...傻馬當啲薯仔雞啲汁係湯咁飲...
今日餐飯仔...喺中野買o既照燒帶子,好好味!!!見傻馬仲有個傷口生緊肉,即刻又煲多次番茄魚頭湯畀傻馬飲.呢排煮飯都唔敢落豉油,又唔可以用蛋...不過呢個照燒汁咁黑,睇怕個傷口都多咗唔少黑色素...弊!!!一於叫傻馬飲多啲奶溝返白啲至得!!!
去到集合地點見到網友姐君,跟住同網友人類"相認"...鬼咩...畀人點晒相o既網友主婦同老師主婦都遲到...
好在網友姐君醒目,睇得出網友人類係同黨,如果唔係就要各自各呆等.
唔等網友主婦同老師主婦,傻魚帶路去某間連鎖家庭餐廳攞位.等咗一陣就有位,坐低冇耐就見兩位主婦笑住行入o黎.
對號入座介紹完之後,各自叫咗個午餐食.跟住梗係一邊食一邊噴口水喇~
網友人類好有心,今朝十點搭咗兩個鍾頭巴士o黎東京參加呢個聚會.
四個鍾話咁快就過咗,個個都好似仲未講夠咁...解散之前,傻魚拉大隊返屋企拎嘢俾老師主婦,跟住又拉大隊去附近啲中國雜貨店買嘢.
買完之後就各自各返歸.
網友姐君好興奮咁去九十九円食品店狂購,傻魚就同網友人類一齊去搵占米粉,而網友主婦同老師主婦就搭電車走人.網友人類,真係唔好意思呀,帶咗你去游街...
由於個個都唔想出鏡,所以今次冇影相.今次聚會好成功,希望好快又可以有第二次,第三次喇...
今日傻馬帶傻魚去亀戶某二手書店買漫畫~逛咗兩間,買咗六本漫畫..."又"大豐收呀!!!呵呵呵~買完喺附近逛,見到有間大超市就梗係入去望望喇...一入到去,不得了呀!次次去親超市都好似啲嘢唔使錢咁,樣樣都想買...於是同傻馬講一陣仲要去逛街,唔可以買嘢呀~點知行經賣鮮肉個櫃,見到啲澳洲和牛扒平靚正喎...傻馬流晒口水咁望住啲肉,結果梗係姣婆守唔到寡喇...好在間超市有免費冰,即刻裝咗袋俾啲牛扒降溫.
原本諗住去東京新丸,買咗牛扒費時拎住逛到啲扒臭.東京新丸就留返下次至去,兩條友浩浩蕩蕩咁去秋葉原逛淀橋買風扇~冇錯!!!傻家終於都有風扇,唔使再焗桑拿喇~嘻嘻!買完再逛咗一陣就起程返歸.
返到屋企附近,又走咗去一百円食品店狂買!杯麵呀,麵包呀,洋蔥薯仔紅蘿蔔呀...買呀!買呀!一袋二袋咁路經肉店再買埋雞扒返屋企煮飯仔...好在今日有"咕哩",傻魚唔使點拎啫...
今晚餐飯仔超正呀!!!咔咔咔咔~
似模似樣見得下人o架!好好味但份量勁大,食到傻馬飽到上心口.仲有兩片牛扒,聽日點整好呢?!!
塊雞皮好鬼脆,好好味~傻魚都食到好飽...再咁落去真係唔多掂檔,係時候收下口至得...
今日約咗網友姐君食晏.傾開喺香港註冊結婚同日本註冊結婚o既問題時,姐君話喺日本註冊結婚啲手續煩到爆~
想喺日本註冊結婚o既朋友,記住留意喇~傻魚遲啲會出一編關於喺日本註冊結婚o既手續,所需文件同會遇到o既難題.傻魚知道有幾位網友正準備嫁o黎日本,希望可以幫到佢哋喇.
今日出咗成日街,抬咗幾廿斤返屋企,攰到散晒...今朝十一點出門,搭火車去到新宿發現唔忘得帶嘢俾傻馬姨喎...結果行返屋企拎完又行返新宿...幫傻馬姨買完手信,即刻開始長征-去傻馬姨千葉屋企.由新宿搭総武快速去東京轉橫去須賀快速去千葉,之後再轉棋須賀各站停去都賀轉單軌...全程需時兩小時...去到仲要行四層樓梯至入到屋...真係乜人都散...成日都冇食過嘢,傻馬姨就煮咗個即食麵仔俾傻魚填肚仔.肚仔飽飽就開工執嘢喇.
正宗又食又拎呀~抬走咗一部吸塵機,一部發熱風扇,一個鍋同兩個枕頭...唔抬死都偷笑呀...回程返到新宿,真係頂唔順,好攰冇力呀...梗係即時打俾傻馬求救喇!約傻馬喺新宿等,跟住一齊返屋企.傻馬返到屋企擺低啲嘢,又走咗出去剪頭髮.剪完返o黎係咁不停話個頭好肉酸,太短喎...跟住喺咁不斷照鏡,研究咗成個鍾,睇下聽日個頭要點整至夠型...傻魚冇力理傻馬,由傻馬自己慢慢搞.
今日冇力煮飯,求其整餐飯仔食...
開正傻馬嗰範,食到停唔到口,連啲汁都飲埋~見到都開心...呵呵~
祝天下間的爸爸父親節快樂~!!!
今日係父親節,傻馬冇咁好命仲未做人老豆,而傻爸同老爺都喺幾萬哩外...人人都一家大細游街,傻馬同傻魚唯有留守家中,費時出街左住人哋家庭樂.打咗成日機,兩條友仔都打到朦下朦下...見個太陽伯伯都收工返屋企慶祝父親節,呢個時候梗係出動o既大好時機喇.去下超市,睇下食物,望下家電,一袋二袋咁返屋企.
今晚冇嘢又搵嘢o黎搞...係咪犯賤呀?!!搞乜?!!
咪就係呢兜咁o既嘢囉...白汁由牛油小麥粉整起,肉醬由肉碎罐頭蕃茄整起.跟住一層一層係咁舖,意粉皮肉醬白汁芝士碎...不斷重複...搞到身水身汗...傻馬話好味...傻魚嗰兜?依家仲喺個焗爐度...
一人一隻匙加一樣材料,輪流喺傻嫲隻糉葉裡面擺料.好好玩,好開心o架.
可惜傻嫲過身之後冇得玩之餘,再也搵唔到咁好味o既糉.之後每年都會食一個糉,睇下遇唔遇到好似傻嫲整o既好味糉.通常都係失望居多.
印象中好似得兩年係食到好味o既糉...今年...連食都冇得食,唔好話好唔好味喇~
見好多人今日都話食糉,忽然好掛住傻嫲...一諗起傻嫲,就想喊...哎...
