今朝齊藤先生打o黎話屋主同意唔使錢俾傻馬擺兩部單車喺個通道度.齊藤先生話佢同屋主道歉,屋主都明白件事係因誤會而搞成咁.仲話可能當時講嘢過份咗少少,叫齊藤先生同傻馬講唔好意思...點解屋主唔直接同傻馬講呀?傻馬懷疑都唔知係咪間仲介公司出錢擺平件事.傻馬話點都要搬,叫齊藤先生同屋主收返啲錢.齊藤先生梗係唔想搞咁多嘢喇.齊藤先生話屋主今朝簽咗份租約.如果傻馬要搬就當傻馬解約,咁就拎唔返啲錢.傻馬聽完勁嬲,話屋主死都唔肯退錢.
點解傻馬咁嬲?就係因為屋主當日話仲未簽份租約,語氣就好似係講緊屋主隨時可以叫傻馬搬走咁.傻馬已經唔多鍾意間屋,仲要俾屋主咁話,條氣勁唔順.傻馬話件事完全錯晒!!!一早應該租傻馬鍾意嗰間,咁就唔會搞成咁.雖然傻馬唔敢發傻魚脾氣,但係就俾說話傻魚聽.傻馬嬲到爆,傻魚梗係唔出聲喇!正話傻馬仲問傻魚明唔明每日都要返去一間自己唔鍾意o既屋係乜嘢感受...咁唔鍾意當初就唔好租喇!!!傻魚又冇迫傻馬一定要租呢間...傻馬有少少嬲自己決定力弱...
咁點搞?屋主妥協讓步,傻馬收唔返啲錢,想搬都冇錢搬...傻魚話住一年搬.傻馬就問到時係唔係傻魚俾錢搬...到時傻魚有錢o既話,俾埋按金上期又點話呀?!!唔租都租咗囉,捱一年囉.話唔定住住下傻馬唔捨得搬呢...不過機會都幾微...哎...
沒有留言:
發佈留言