今日因為某些神秘原因,傻魚帶同神秘嘉賓去網友主婦屋企踩場!出咗門口之後打咗個電話俾網友主婦,然後就去同神秘嘉賓會合.兩個人搭緊車去目的地途中,收到網友主婦o既電話.
網友主婦: 「傻魚正話打o黎話約幾點呀?」
傻魚: 「兩點囉...不過依家喺品川喇!」
網友主婦: 「係?!!咁我依家出門口喇~」
哈哈~原來網友主婦之前仲未訓醒,聽完傻魚個電話之後就唔記得約咗幾點...去到等咗一陣,同網友主婦會合之後又三人行去食晏.今次係自己俾自己嗰份.食完行咗陣街,買埋餸,跟住網友主婦俾錢一人揀咗一件西餅就剷咗上網友主婦屋企搞破壞!去到梗係又同洪興狗仔無間狗仔玩喇...但係神秘嘉賓怕狗仔,好在兩個得意狗仔都好乖冇嚇親人.
一邊嘆茶食西餅,一邊傾得好開心.今日又係笑笑笑~如果有多一個人實會開枱打返幾圈...網友主婦手痕咗好鬼耐喇...跟住一齊上網同夢成真傾咗一陣,傻魚就同神秘嘉賓打道回府.返到屋企俾傻馬睇今日傻魚買o既平鰹魚,跟住問傻馬想食乜...點知傻馬又話要出去食拉麵...傻魚就話如果傻馬未諗到要去邊間,咁就唔好出去食喇.傻魚唔想又喺條街度游蕩...
傻馬今次醒咗...出發前已經諗定要帶傻魚o黎呢間食...
呢間店每個月o既四,八,十四,十八,二十四,二十八號啲餃子都係半價.睇睇今日係八號喎...咁傻馬就叫咗一客餃子喇!
傻魚食呢款...幾好味...
傻馬食呢個...傻馬話辣得o黎都幾好味.傻馬有個目標,就係要去晒新宿所有o既拉麵店食,跟住出食評喎...不過,傻馬都唔識點品嚐,又點寫食評呀?唔好到最後又要傻魚出馬呀...傻魚唔制o架!!!
沒有留言:
發佈留言