抄車...

今日訓到好晏,所以冇出街.傻馬自己一個驅車出街打機,傻魚就留喺屋企發霉...到咁上下時間,走去廚房望一望.見冇洋蔥同牛奶,所以就出街買.途中打咗幾個電話俾傻馬,但係傻馬都冇接...買完返屋企開工準備晚餐嗰陣,傻馬打返電話俾傻魚...

傻馬: 「喺邊呀?」

傻魚: 「喺屋企囉...」

傻馬: 「哎呀!仲諗住叫係魚順便去買消毒藥水添...」

傻魚: 「點解要買消毒藥水呀?」

傻馬: 「抄車呀..」

傻魚: 「咁傻魚依家即刻出去買...」

一路行去藥房,一路想喊...平時傻馬抄車或整親都唔會叫傻魚去買消毒藥水.今次實係好傷喇...唔知傻馬驅唔驅到車返屋企添o架...越諗就越擔心,打電話俾傻馬又係冇人聽...仲要係落緊雨添...一行出藥房,咁啱望見傻馬驅緊車...快步跑過去諗住追傻馬,當然係唔夠傻馬部車快喇...返到屋企樓下傻馬打o黎,傻魚話喺樓下,叫傻馬快手沖個涼洗下啲傷口先.一返到屋企,即刻衝入屋睇傻馬.見到傻馬喺度沖緊啲傷口,仲好痛咁...右邊身多處擦傷,最嚴重係右邊盤骨位...成層皮冇咗...

傻馬: 「傻魚唔好理傻馬喇...等傻馬自己慢慢洗...傻魚去整嘢食喇...」

原本興致勃勃整グラタン,點知搞單咁o既嘢...即刻冇晒心機...見傻馬沖完涼,咪同傻魚搽消毒藥水囉...

傻魚: 「好痛o架...忍住呀...」

傻馬雖然話唔係好痛,但係傻魚就覺得好痛囉...跟住就叫傻馬唔好亂動,等啲傷口結疤...之後返廚房整埋啲嘢...

傻馬話好好味,但係傻魚就食不知味...成餐飯凈係掛住叫傻馬唔好亂動...傻馬話聽日要去築地喎...傷成咁,有啲傷口仲流緊血,都仲要出街...哎...唯有跟埋去睇住囉...嗚~