關東地方香港人太太會

呢排成日同網友主婦傾開話好多嫁咗o黎日本o既香港人太太,冇乜朋友之餘,日日凈係喺屋企執屋煮飯,生活除咗家務同老公之外就係出街買餸...當中有好多人融入唔到日本o既生活,有事想搵個人呻下都冇,好多時都覺得好無助同孤獨.可能有好多人會覺得,嘩!嫁去日本喎!好威水,好令人羡慕呀!但係其中辛酸,若唔係親身經歷過係唔會明白.去到一個文化背景,教育思想唔同o既地方生活,人生路不熟有時真係好慘...初頭可能會好興奮,慢慢就會發現好多嘢同自己想像o既有唔同.始終唔係自己成長o既地方,唔係自己o既地頭...有細路仔o既起碼有多個世藝唔使咁悶.冇細路仔又冇乜朋友o既,老公返咗工之後,一個人喺屋企真係會頭生菇!!!所以傻魚成日都成頭菇!嘩哈哈哈哈~

所以網友主婦同傻魚都想搞個香港人太太聚會,俾啲港人太太可以出o黎吹下水,呻下,玩下,識多啲朋友仔唔使咁悶.其實最重要係提供一個平台俾啲港人太太可以傾下呻下,有乜事可以搵個"先輩"問下講下,唔使再咁無助同咁孤獨屈到病.

傻魚想喺呢度呼籲一下,所有住喺關東一帶o既港人太太,無論係嫁咗俾日本人,或者係跟老公過o黎o既,若有興趣參加,請回個應.傻魚會同網友主婦安排一下,再搵日約埋大家出o黎聚一聚!一於搞個關東地方香港人太太會...若果有人諗到個型啲o既名,請講出o黎俾大家揀揀!

後記: 呢編嘢係咪應該喺網友主婦度寫會好啲呢?