事件經過

今日一訓醒,傻馬就話要起程去物業仲介公司搵負責人.喺傻魚準備換衫之際,個物業仲介負責人,齊藤先生就打o黎同傻馬傾咗一陣.齊藤先話轉頭會打俾屋主之後會過o黎搵屋主傾,叫傻馬等佢o既電話.過咗一陣,齊藤先生再打o黎,今次輪到傻魚同佢傾.齊藤先生同屋主傾過,屋主話如果要擺兩部單車,咁就要每個月俾一千円當係租個位停單車.傻魚當然話唔會俾喇...有乜理由之前話得,依家話要收錢呀?收咗線之後,傻馬就同傻魚剷咗上間仲介公司搵個大粒啲o既傾.

經過傻魚了解之後,事件經過係咁...當初去睇樓嗰陣,傻魚見間屋冇停單車位,已經問齊藤先生兩部單車可以擺邊.齊藤先生話會問屋主.呢間屋其實屋主唔想租俾外國人.係齊藤先生唔知點同個屋主傾,講掂個屋主租俾傻馬.之後去簽約嗰陣,傻魚又問同一個問題.齊藤先生話個屋主回覆可以擺喺屋主個停車場度.但係傻魚就話唔係咁好.因為傻馬間唔中會半夜去驅車,費時嘈親屋主.咁齊藤先生又話再問個屋主.

其實如果當時話唔可以擺兩部單車,傻魚一定唔會租呢間屋.咁到咗搬入去嗰日,齊藤先生帶傻馬同傻魚去見屋主.咁啱屋主唔喺度,咁就見咗屋主老婆.當時傻魚再三確認兩部單車可以擺邊.屋主老婆話唔可以擺佢個停車場,但係可以擺喺入口通道兩邊.傻魚仲重申係兩部喎.屋主老婆仲指埋兩個地方話可以咁擺.咁搬咗入去一個星期後買咗部大單車.跟住兩個星期後買埋部可以摺埋o既細單車.其實原本係想買兩部大單車,見個位咁細,費時左住條通道所以決定買部摺得埋o既細單車.

傻馬幾乎日日都見到屋主,但係屋主都冇出聲.直到上個星期,傻馬話屋主打去公司搵傻馬,咁啱傻馬行開咗,咁傻馬個同事之後就話返俾傻馬知屋主叫傻馬將部細單車搬返上屋企個露台度擺.差唔多日日放工返o黎都見到屋主,屋主都冇出聲,所以傻馬當時就冇理到...跟住尋日屋主可能頂唔順終於開口話傻馬.屋主話傻馬唔守規矩,唔係咁好喎...咁傻馬就話當初係屋主老婆話可以咁擺.屋主就話佢老婆係冇權o既,最終話事嗰個係屋主.咁關人鬼事咩?傻馬同傻魚點鬼知你屋主啲家事喎...跟住屋主話佢一早就講過唔可以咁擺,之後仲話打過電話俾齊藤先生同傻馬公司個庶務講過.但係傻馬都係上個星期至收到消息.

屋主話大家都係受害者,叫傻馬搞清楚到低係邊方面有問題喎...有乜理由要傻馬去查清楚個來龍去脈o架?跟口個屋主仲話份租約佢仲未約...之後仲好似話要收停單車錢.咁啫係點呀?係咪傻馬唔肯俾停單車錢就唔租俾傻馬要傻馬搬屋呀?咁今朝齊藤先生打o黎陣就話佢都有錯,佢之後應該親自連絡屋主講聲.仲話不如嗰兩年o既停單車錢由佢私人俾屋主喎...間物業仲介公司負責人就話其實係因為傻馬公司啲文件唔齊,所以屋主仲未簽張租約...

個問題係:

1. 當初屋主老婆話得,咁傻魚至租呢間屋,然後去買兩部單車...如果一早知唔得就唔會租呢度.

2. 點解要俾停單車錢呀?連單車位都冇學人收停單車錢?

3. 就算真係未簽份租約,使唔使喺呢個時候話俾傻馬知呀?咩意思呀佢?

4. 成日撞口撞面都唔講,搞到依家至出聲?想點呀?

正話齊藤先生打o黎話搵唔到屋主,聽日會再跟進件事.傻馬就話係屋主有心唔聽電話咋下馬...無論點都好,錢係唔會俾,單車會照擺.解決唔到咪叫齊藤先生問屋主拎返錢跟住租另一間囉...仲之唔會妥協...

追申: 冇心機加洋蔥頭仔呀!!!