関東地方港人太太會(暫名)

前日出咗編網誌呼籲住喺関東一帶o既港人太太得閒出o黎一齊玩下.可能傻魚講得誇張得滯,又話要改個型名,又要人回應,搞到啲人以為要報名...其實,唔使o架!網友主婦同傻魚想搞個聚會,俾啲港人太太平時得閒冇乜嘢做可以識多個朋友,間唔中出o黎玩下咁啫.其實唔一定係港人太太o既,留學生呀,港人丈夫呀,路過o黎出差或旅行咁啱有聚會都歡迎參加o架.只不過家庭主婦平時冇乜嘢做,日日留喺企生菇,又好悶o既...好多初o黎報到o既,人生路不熟,冇朋友,老公又要返工冇人陪,有事又冇人幫,都幾無助同思鄉o架...間唔中出o黎同啲同聲同氣o既同鄉玩下,咁咪唔怕會抑鬱成病囉...一班師奶仔一齊食下飯,交流下御夫術,湊仔經,廚房功,呻兩句,分享下生活趣事,幾開心呀!

所以想參加呢個會係唔使報名,唔使俾會費,唔會有會籍.鍾意o黎就o黎,唔鍾意可以唔出現,好自由o架.當然,如果出o黎玩o既梗係要出返自己嗰份喇.同網友主婦商量過,決定喺傻魚呢度出會訊.如果大家想知o黎緊會有乜活動,記住密切留意港太會訊喇!

仲有,麻煩有興趣參加o既朋友,請用私人留言或私人回應留低大家o既msn,電郵或電話,以便日後有乜活動可以即時通知大家.如果大家覺得同傻魚唔熟,唔識傻魚,唔想將啲咁私人o既嘢留俾儍魚,都可以喺網友主婦度留o架!一樣啫...若果大家之前冇收到網友主婦o既私人留言,唔使怕羞,唔使唔好意思,呢個會好歡迎你哋參加o架!但係請大家注意,呢個會主要係俾啲住喺日本o既港人太太交流一下生活,唔係俾啲o黎旅遊o既人搵導遊.當然如果係想了解多啲日本o既生活咁就無任歡迎喇~