祭り三昧

尋日一口氣寫咗三編嘢擺上o黎之後,今日好鬼懶添...但係都要報導下尋日o既行程...尋日聽完齊藤先生個電話,傻馬嬲爆爆咁同傻魚出街.去到淺草一個叫今戶神社o既地方,諗住有祭典實會好熱鬧.點知...

抬o既人仲多過睇o既途人...最引人注目o既就係行喺隊頭呢位天狗同埋佢身後嗰兩位靚女姐姐...好多小朋友走埋去同天狗握手...睇咗一陣,傻馬話呢度冇嘢睇不如去另一個祭典睇下.另一個祭典喺南千住,離淺草唔係好遠,搭巴士十幾分鍾就到.去到南千住素盞雄神社,好多人圍住啲屋台,好熱鬧.行咗一陣,買咗盒炸日本年糕食.行到去神社其中一個入口,見到檔賣廣島燒餅好多人排隊...好似幾好食咁,傻馬叫傻魚排隊買一份食.就喺呢個時候,有枱神輿入緊神社...

個入口好窄,加埋啲屋台,搞到個個步步驚心.廣島燒餅檔主話每年都會撞到佢個頂,所以不停伸個頭望下.

今次個祭典有度唔同,見到都覺辛苦...睇咗好耐,諗住返屋企.一行出神社就見到對面街又有神輿o黎緊...睇真啲後面仲有幾台喎...次次都係咁...臨走至見到啲好戲...

呢台好多靚女姐姐抬...

後面仲有好多台喺度等緊...

成條街好多冇着褲o既男人喺度行o黎行去...有啲仲唔着褲坐咗喺條街度...都幾"壯觀"o架...喺呢條街逗留咗好耐,走嗰陣都七點喇...但係都仲有幾台仲未起程入神社...唔知最後搞到幾點至完場呢?