冇心裝載

傻馬炒車,傷痕累累,好多嘢都唔可以食...

尋日傻馬個午餐...覺唔覺有乜唔妥呀?

傻馬今日個午餐...又覺唔覺有乜唔妥呀?兩日都有蛋呀!!!都話咗唔可以食蛋o架喇...傻魚講o既嘢又當耳邊風,冇心裝載喇...傷口發炎嗰陣就知死!!!

尋日原本想出街幫傻馬姨買手信,但係見會落雨就打消咗出街o既念頭.諗住落雨前出去買餸,順便托包米返屋企.點知俾傻魚望見對面街啲樓有人逐戶拍門喎...呢啲咁o既時候梗係避下先喇,費時俾人捉住問長問短.點知等下等下,個天就開始落大雨喇!搞錯~諗住落雨驅唔到車,咁咪買唔到米囉...於是拎住把傘行去超市凈係買餸算喇...但係人總係犯賤o架!!!唔知黐咗邊條筋,又買罐頭,又買半個南瓜,仲走咗去買米呀!!!係咪黐鬼咗線呀喇...結果咪拎到死死下囉~返到屋企竟然見到傻馬坐咗喺度喎!!!原來傻馬尋日去咗個客度,所以早收工.早知搵傻馬幫手抬喇!!!不過有早知就冇乞兒喇~算...

咁辛苦抬半個南瓜返o黎,即時用咗一半o黎整雜菜煲...結果煲耐咗,俾啲南瓜同粉絲索晒啲汁...仲整咗好鬼大煲添...

今日午餐清晒煲雜菜煲.食完上一陣網,跟住就走去秋葉原.行咗一陣都搵唔到想搵o既嘢.諗住打俾傻馬問下,點知打極都飛留言...再行多一陣,行到好攰頂唔順咪返屋企囉.一出火車站傻馬就打o黎,話個電話冇電.唔怪之得搵唔到人喇...買少少嘢,跟住快步返屋企煮飯仔.

唔知係咪個火太猛,差啲煲燶啲排骨...乾晒水,冇晒汁,但係就好入味!!!好在發現得早,如果唔係燒埋間屋都似...下次都係唔好一邊煮飯一邊上網...好鬼危險~真係一額汗...