壞消息

正話傻馬放工返到樓下,撞到屋主.原來個屋主就係請傻魚食過期芝士蛋糕嗰個男人!真係失敬晒!!!屋主見到傻馬就同傻馬講兩部單車唔可以擺喺門口個通道度.仲話之前已經同個物業仲介負責人仲有傻馬公司個庶務姐姐講過.但係傻馬冇收到通知喎...係上個星期至有人話屋主打o黎叫傻馬將部細單車抬上樓.之但係又咁喎...喺搬入去嗰日,傻魚再三同屋主個老婆確認過,八隻耳仔清清楚楚聽到屋主老婆話兩部單車可以咁擺.點解依家又要傻魚搬返屋企個露台度呀?傻魚住二樓,露台喺門口o既另一邊,想抬死人咩?部細單車就話啫...大單車點抬呀?個樓梯都唔夠位...整花佢啲牆點算呀?屋主話大家都係受害者,叫傻馬聽日去搞清楚到底係邊度出咗問題.仲話份租約佢未簽...傻馬返到o黎話睬佢都傻.都住得唔開心,不如搬!就係咁,聽日傻馬話要去搵返嗰個物業仲介人搵過間屋.搬屋咪啫係又要使錢?!!都唔知拎唔拎得返晒之前交啲錢.搬屋咪又啫係要傻魚做餐死?!!哎...真係攞o黎搞呀!!!