激親!!!

豬流感擴散得好快...尋日韓國嗰個女人係確診個案,今日美國死咗一個人,正話又話有個女人喺成田空港由美國飛o黎o既"嘥筆"飛機裡面接受測試,證實係陽性要接受隔離,送咗去附近醫院作進一步測驗.最無辜係坐喺兩米以內o既其他乘客都要被隔離,直到證實冇被傳染為止.而世衛就將個戒備由四級升到去五級...未有事o既埃及就未雨綢繆,話要殺晒全國o既豬,搞到啲豬農喊晒口...咁搞法咪真係要戒豬囉...不過,冇聽日本講要殺豬,應該都仲有貨源,係睇啲人敢唔敢食啫...今日傻魚去超市都仲見到有豬肉賣...一時唔記得去買返個口罩傍身添...可能已經賣斷市...

唔理得咁多o架喇...煲返煲糖水食下先...
今日傻馬遲返工(唔係遲到喎...),所以遲收工.今朝焗咗個豬仔包畀傻馬食,傻馬食完仲話今晚八點可以返到傻家...傻魚等到差唔多九點都仲未見傻馬,咪打個電話睇下傻馬喺邊囉.點知傻馬冇接,於是傻魚就整個短訊過去.冇返應喎...九點幾傻馬至返到,問傻魚係咪搵過佢,又話傻魚多嘢講...講咗啲乜咁多啫?傻魚都係想知應該幾點炒餸,咁傻馬一返o黎就可以即刻開飯...如果係夜返,傻魚可以自己食先,唔通要傻魚等到傻馬三更半夜返到o黎至食飯咩?今日心情好靚o架嘛...即刻冇晒心機...

求其煮完就算!餓到傻魚死死下...哼~多嘢講呀喇...唔講咪唔會多嘢講囉!傻魚決定咗今日同聽日都唔同傻馬講嘢!又睇下到時邊個多嘢講...黃金周,要出遊,睇下傻馬到時點算囉...傻魚乜都唔知乜都唔講!聽朝,自己焗豬仔包食囉...唔好嘈住傻魚瞓覺呀!傻魚會食人o架!!!

2009年花見(五)@国営昭和紀念公園

今朝一起身就即刻走去搵焗爐...

好味呀~

搽咗啲蒜味牛油食,正!
食完摺埋啲衫,然後準備出街...今日係紅日,傻馬唔使返工.傻馬換完衫企咗喺度望住傻魚哈哈笑...問傻馬做乜,傻馬話自己今日快過傻魚搞掂晒啲嘢可以隨時出得門口...傻魚即刻話傻馬一朝起身乜都唔使做就有得食,食完就坐咗喺度上網...而傻魚一瞓醒就未停過,摩打手咁做做做...傻馬竟然夠膽咁講嘢,係咪諗住以後都食自己呀?傻馬即刻賣口乖,係咁係喎係喎,嘻嘻嘻...傻馬真係唔知個死字點寫!
行到出駅附近,傻馬話要食埋嘢至去...

呢間嘢傻魚想去好耐,但係次次傻馬都話唔好...原來佢唔係叫黑豚,係叫鳥豚...

舖仔細細,都幾多嘢食o架...

傻魚叫咗個天丼,好好味~六百八十円咋!

傻馬個炸蠔定食,好味喎...七百八十円...
今日係昭和の日,即係紀念昭和年號成立之日.咁就要應下節,去国営昭和紀念公園睇下花喇...今日特別唔收入場費,所以好多人一家大細o黎玩...呢個公園好鬼大...

唔知係乜花...

好靚...

今日好天到呀...雲都冇...

呢度每個月都有花睇...

開得好靚...

日本庭園.

鬱金香...

好多呀~

花多人都多...

滿開~

好多小朋友喺度玩水同埋唔知搵乜...

園內巴士,好得意!今日冇"全日通",上車三百円...

仲以為係薰衣草添...

真係好靚...

好似一個個超大花籃...

如果傻家有位種咁多花就好喇...

好想瞓喺啲花叢裡面...

傻魚一見到呢架巴士就即刻追住o黎影...

眼瞓返屋企瞓喇...好阻街呀~

唔記得叫乜花添...

好大片花海呀~

五顏六色,好靚呀~

好大風,吹到完全聽唔到傻魚把聲...

呢個位好正...

見到有小食店,整返杯搽茶雲尼拿軟雪糕食下先...食咗啖至醒起要影相...呵~

呢位阿叔啲畫功好掂...好多人圍住睇佢大顯身手...

未畫完都咁靚,完成品一定好正...

繼續影...

低抄正!

好舒服呀~

啲花又靚喎...

瞓喺度望啲花應該會係咁樣...

清新空氣,仲有花香添...

兩條友係咁影,影到太陽都開始落山...

呢個位好多人影...又真係幾靚o既...

又有巴士呀!好似總共有四架...行行下聽到廣播話仲有一個鍾公園就會關閉...行快啲至得...

中午嗰陣開到咁靚...

臨走嗰陣啲花都"收埋"...
返到傻家附近傻馬突然話想食今朝個豬仔包,一陣又話聽朝返工前都想食喎...淨返兩個,唔通傻魚冇份食凈係整畀傻馬食咩...結果去完書店買雜誌之後就"各站停",每間便利店都入去睇下有冇得賣...結果係冇o既...傻馬唯有忍口唔食住,留返聽朝做早餐...返到傻家七點鍾,乍乍林煲飯先...

整下呢樣,搞下嗰樣,結果遲咗煮餸...今晚八點半至開飯...不過唔緊要,傻馬已經食咗好多零食,一啲都唔肚餓...哼!
同場加映:

見到好搞笑,咪影下囉...呢張海報貼咗好耐o架喇...次次見到都會望多兩眼...