啱踏入2009年,煩完傻馬左諗右諗返唔返香港過年之後又要煩搬唔搬屋...其實當初租傻家嗰陣,傻馬又係左諗右諗,諗咗好耐都唔知想點...結果係傻魚話租...等傻馬諗得o黎可能要瞓天橋低...今年四月尾租約到期,要諗續租定係搵地方搬...傻馬又係左諗右諗...傻魚知道傻馬實係咁,所以預早三個幾月叫傻馬慢慢諗掂佢...呢隻傻馬...叫傻馬諗,傻馬就三朝唔埋走o黎問傻魚點好...傻魚點知點好啫...又唔係傻魚畀錢...煩到傻魚想打人...如是者就咁諗咗成個月,返完香港過完年都仲未諗掂...大佬呀!傻魚要預時間,睇下要幾時返東京o架...如果搬o既話,傻魚要早啲返去睇下屋,執下嘢...如果唔搬就梗係唔使煩喇...跟住嗰個月都不停係咁討論呢個問題,但係就完全冇結論.傻馬唔鍾意傻家個屋主,唔鍾意住二樓,嫌駅遠,嫌入口冇門鍾搞到成日收唔到包裹要叫人再送,嫌驅車要抬部車上上落落...咁唔滿意咪搵屋搬囉...搬o既話又要畀過晒啲礼金敷金,好金喎...但係傻家之前交咗o既敷金會退返o架嘛...要返工冇時間去搵屋喎...咁周末分啲時間去搵下囉...其他同級o既屋都幾貴下喎...都係貴少少啫,咪當畀錢買方便囉...咁搬唔搬好呢?搵到咪搬囉,搵唔到咪算囉...傻魚不停講同一堆說話,真係好煩...到咗二月尾屋主打去公司問會唔會續約,傻馬至捨得去搵下屋.到最後因為睇唔啱,加上好啲o既租貴,結果都係唔搬喇...吹漲!
同時,奶奶又發功喇...返到香港第二日食團年飯之前見傻馬唔喺附近,就即刻拉住傻魚講老爺問奶奶傻魚唔生係咪因為間屋多嘢同冇位...之後又問傻魚使唔使買樓,如果冇錢畀首期可以同老爺商量.又叫傻魚得閒捉阿老爺一齊執下間屋...點解要傻魚去捉住老爺一齊執屋呀?點解奶奶唔搵老爺一齊執呀?傻馬返咗東京之後傻魚仲慘...三日唔埋兩日阿奶奶就捉住傻魚係咁講...講阿師奶甲長,說阿師奶乙短...好煩呀!傻魚冇興趣知啲師奶日日搞啲乜.再唔係就話隔離座大單位有人放盤喎,可以諗諗喎...間唔中又會提下往事,講下嫲嫲壞話,講下老爺壞話,講下傻馬細個啲趣事...傻魚已經聽過不下數億次,調轉背返出o黎都得呀.老爺問生仔單嘢奶奶講咗三次.奶奶恨抱孫?梗係唔係喇...奶奶之後講咗五次,話咁o既時勢生個細路出o黎,自己辛苦之餘,個細路仲辛苦,真係唔生好過生咁話.你哋話係咪搞到人都癲呀?!!奶奶係唔會理乜嘢時候或情況,總之一見到傻魚就會捉住傻魚係咁講係咁講...又成日話傻魚要減肥唔可以食呢樣,唔準食嗰樣...阿大姑,傻魚已經有好多嘢唔食得,仲要唔準食呢樣唔可以食嗰樣...咁不如傻魚餐餐凈係食生果同飲水飽囉...傻魚差啲畀奶奶搞到精神分裂!
又同時,老爺話想賣間祖屋,問傻馬意見.例牌,傻馬都係左諗右諗.結果係傻魚諗埋傻馬嗰份.呢單嘢一定唔可以畀奶奶知,所以成日鬼鬼祟祟咁同老爺傾...同完老爺傾又要同傻馬傾,傻魚做中間人做到好攰...
又再同時,傻魚間"五星級避難所"暫時封閉...呢間"五星級避難所"係平時傻魚覺得煩,又唔想畀奶奶纏o既時候就會去暫住一兩日.屋主成日要返大陸做嘢,而同時佢老公會返父母家住,所以傻魚通常會喺呢啲冇人o既時間上去住.咁啱嗰排屋主間公司發生咗啲事,所以大部份時間都留喺香港.傻魚唔想左住人,覺得唔係咁方便,所以嗰排冇上去住.冇咗可以一個人清靜o既時間同空間,仲要焗住喺屋企日日畀奶奶哦...想靜靜地諗下嘢,計劃下o黎緊要做乜都唔得.百幾樣嘢要諗,諗下自己o既嘢,諗下公司o既嘢,諗下將來o既嘢,仲要幫傻馬諗埋搬唔搬,去邊度玩...
又再再同時,有朋友同情人嗌交,分手,鬧離婚,婚前恐懼症等又走o黎搵傻魚呻...自己啲嘢已經煩到爆,仲要心理輔導朋友,幫朋友解決啲奇難雜症...個人燥到爆!!!喊又喊唔出,瞓又瞓唔到,又冇得發洩,壓到個人變晒型...
啱啱好返啲啲,伯父又...即刻崩潰!喊咗兩日.好擔心傻爸,再加上傻媽喺呢個非常時期都仲要去旅行,所以就決定返娘家.講起傻媽,真係激氣!伯父最後一程唔送,走鬼咗去旅行...去乜鬼旅行啫?!!幾錢呀?畀返你囉!!!伯父出殯嗰日嗌傻媽個名但唔見人,幾鬼肉酸呀!係個個到齊,只差傻媽一個呀!嬲到傻魚呀...自從送傻媽機嗰日同傻媽講過幾句嘢之外,到今日為止傻魚都冇同傻媽講過半句說話.如果佢唔係傻媽,傻魚實鬧爆佢!傻魚好明白一個道理,朋友可以揀,父母係冇得揀...冇計...
喺呢度要澄清返少少嘢...傻魚冇同奶奶嗌過交,冇頂嘴,係間唔中黑面啫...奶奶個出發點其實係為傻魚好,只係用錯方法啫.所以好多時傻魚都會忍,然後吞落肚...嘈係絕對解決唔到問題,同埋嘈完蝕低o既係自己.同一個講唔通o既人嘈,其實係搵自己笨...間唔中真係頂唔順先會黑面.不過奶奶一啲都唔怕人哋黑面,照說也...吹漲~傻魚知奶奶係愛屋及烏...其實傻魚都鍚奶奶o架.去邊玩都會買啲嘢送畀奶奶.母親節同奶奶生日,如果喺香港都會同奶奶食飯,唔喺香港o既話就會打電話畀奶奶.知道奶奶會好掛住傻馬,會成日迫傻馬打電話畀奶奶...傻魚可以講已經做足媳婦o既本份...係唔執屋同煮飯啫...老爺啲嘢太多太亂,傻魚唔敢執老爺啲嘢,因為有好多嘢如果畀傻魚執,個垃圾桶會即時漲爆.奶奶煮嘢咁好食,再加上奶奶咁"專橫",都係奶奶煮好啲...奶奶o既性格其實係成長環境o既影響.傻魚係明o既...但係有時真係頂唔順...如果奶奶唔係咁,傻魚一定會一直同奶奶一齊住.話晒奶奶得傻馬一粒仔,傻魚都有責任照顧奶奶...奈何真係唔得...忍呀忍~忍石可成金!!!可惜忍極都唔見嚿金,結果爆咗鑊金...傻魚驚有朝一日忍唔住會同奶奶爆鑊金...怕怕!唯有諗諗計睇下點發達,或者等個天跌啲錢落o黎畀傻魚買兩層樓,同奶奶做隣居囉...咁咪可以照顧兩老,但又唔使住埋一齊囉!好計好計~
另外,要多謝好友黃小箎成日聽傻魚呻.喺傻魚身邊,會聽傻魚講嘢o既人...數o黎數去都係得嗰兩個...真係好多謝黃小箎,成日唔瞓同傻魚做心理輔導.真係感激不盡!!!傻魚依家好返好多喇...希望唔會咁快再病發喇...低處未算低,但係傻魚唔希望會有更低潮o既時候.(喃嘸阿隬陀彿...)
講完啲唔開心嘢,講下今日先...今日...冇出街.玩咗兩日好攰,要休息下...做少少家務,攤下睇下雜誌,電視,咁又一日喇...晚餐...懶人餐...
傻馬碟咖哩飯...
傻魚碟咖哩飯...個雞鎚仔真係珍貴!
啲咖哩,薯仔同茶碗蒸,全部擺入煲滾水度煲六分鍾,然後撕開啲袋倒出o黎就食得...呵呵~真係懶到出汁...
沒有留言:
發佈留言