冇嘢做,傻馬又唔得閒理傻魚...傻魚睇雨睇到頭頂生晒菇...好!去煲糖水!!!煲完今晚食完飯就有得食...
個雪櫃冇乜貨添...近排都冇乜點塞爆個雪櫃,因為遲啲又出遊,費時清唔晒會嘥嘢.午餐煮公仔麵食,食完傻魚例牌會肚痛...
晚餐就好有心機咁整咗個螺絲粉.傻馬又係例牌想架辣椒醬,當然又係畀傻魚喝住...傻魚已經落咗辣椒乾去煮,仲落乜鬼辣椒醬啫...落芝士粉喇...結果傻馬碟嘢舖咗成寸厚o既芝士粉...好難得至整到咁有水準o既螺絲粉,就咁畀傻馬糟蹋晒...唉~唔鬼理傻馬,傻魚嗰碟好好味~
今日整咗乜嘢糖水?上個星期出遊前買咗一大包番薯冇整到,今日就一次過切晒o黎整...
落咗啲薑同片糖去煲...其實煲之前係咪要用水浸下啲番薯先至拎去煲呢?傻魚真係唔多曉...求其切完就即刻煲...都幾好味...如果有埋湯丸就仲正...食完今晚兩條傻嘢實係咁放屁,間屋實臭死都似...仲有三碗,可以食多三日...今晚熱食,聽日開始可以凍食...o黎緊三日間屋都應該幾臭下...上面嗰位仁兄,喺露台食煙嗰陣千祈唔好跌支點緊o既火柴落o黎呀!爆炸o既話會炸埋你o架~
沒有留言:
發佈留言