光陰似箭

話咁快又到咗星期五,聽日係周末喇~周末有乜搞作?咪係呢個季節最熱門o既活動囉...唔知係咪個人越大啲時間就過得越快?以前讀書嗰陣硬係覺得啲時間好難過,好耐至一年,"捱"好耐至等到假期可以去玩...但係依家,唔覺唔覺又一年,唔覺唔覺又話就o黎到夏天喇...啲時間快到都唔記得自己做咗乜...定係快得滯記唔切?又有可能係老人痴呆症開始發作,個人正式進入"老人期"...
數一數...嘩~原來自己已經咁"老"o架喇...仲以為自己好細...近呢幾年,每逢有人問傻魚幾大,傻魚都要諗一諗,計一計...可能太耐冇乜點做嘢,跟時間脫咗節,唔係好知已經過咗幾耐...個心態好似喺幾年前一路停滯不前,個人同啲時間o既距離越來越遠,越來越追唔上...可能因為咁,成日畀人話幼稚同細路仔...人老心不老嘛~(自我安慰中...)
而傻馬近呢幾年就成日話自己老,係阿伯...咁阿傻馬伯,仲有咁多嘢未做就老得咁快,好唔低喎...仲有就係,傻馬自己一個老好喇...傻魚仲有好多嘢要做,仲有好多嘢想試...傻魚唔要咁快老o架...(哈!)

今晚好懶,凈係整咗個南瓜煲.傻魚太心急,個牛油果生得滯...而個山菜帶子係上次關生關太o黎玩嗰陣喺輕井沢買o既手信,就o黎到期喇...快啲食先...好好味呀!多謝關生關太~粟米湯係傻馬之前買落擺咗喺雪櫃個幾星期o既即飲盒裝湯.叮返熱飲都幾好味...