代價

今日啲電視都仲係咁報導"草剪光"單嘢.傻魚睇得出"草剪光"係一位好努力,事事都會盡力做到最好o既藝人.好自然,啲壓力都會好大.日本人慣咗用酒精去減壓,所以一到夜深條街就會有好多"醉酒佬"...近年仲多咗好多"醉酒婆".飲醉酒之後四圍咀人o既又有,搵人打o既又有,叫人打自己o既都有,當然仲有除衫o既...傻魚以前遇過有位"泡菜國"同學仔,飲醉之後會除衫跳上張枱唱歌跳舞...好在當時有其他"泡菜國"同學仔即時制止嗰位"舞男",如果唔係傻魚都唔知要洗幾耐眼至得...以前好多時新聞會報導話啲人飲醉酒攤喺條街度瞓,第二朝醉醒發現唔見晒啲財物...又聽講過有啲"醉酒婆"畀人"抬"入時鍾酒店,第二朝醉醒發現自己一條友全裸攤咗喺張床度"唔見咗隻豬"...當然係唔知畀邊個"攞"咗喇...飲醉酒,除咗傷肝之外,個代價有時都可以好大.所以,酒都係飲少少好喇...
"草剪光"之前都試過飲得好醉冇晒知覺,不過當時有其他人睇住佢或喺自己屋企.今次"草剪光"喺第一間舖飲咗幾杯啤酒加十幾杯燒酎,已經飲得好醉...之後仲去第二間飲咗一杯半啤酒..."草剪光"話自己喺第一間飲咗五杯啤酒加三杯燒酎之後就冇晒記憶.之後發生乜事全完唔記得.好似係話架的士見"草剪光"咁醉,所以拒載.而嗰個公園離開"草剪光"屋企只係一百五十米.相信當時"草剪光"係諗住經由公園返屋企途中以為自己已經返到屋企,所以除晒啲衫喺度嘈...有人見到就打電話報警,警察o黎到嗰陣,"草剪光"仲同警察講"裸體有乜唔啱呀!"咁...日光日白好多人行o黎行去就話啫.夜媽媽人影都冇隻,又真係唔多"有傷風化"喎...得嗰十幾度,凍傷風就有份...都係出名累事...今日放返"草剪光"出o黎,正話九點鍾開埋記招同所有人,"粉絲"以及其他隊友道歉,應承以後會少飲酒.咁多年o既努力就咁化為烏有...呢個代價都真係幾大.有啲人見"草剪光"唔死,仲踩多腳話"草剪光"呢單嘢令到個經濟損失咗最少六億...仲有尋日話"草剪光"係"最低の人間"嗰位白痴高官畀人爆轟完,今日走返出o黎道歉兼收返嗰翻說話.低能o架...傻魚唔信佢從未試過飲醉酒之後做傻事...講嘢之前都唔用個腦諗下o既...公眾人物o黎o架嘛,講嘢要負責任o架.
另一單鬧得熱烘烘o既事件,"為私"日本藏毒一案今日終於判咗喇..."為私"被判監兩年,緩刑三年,聽日可以返香港喇...又係一個用錯方法減壓o既好例子.真係害人害己...如果食煙等同燒銀紙,咁吸毒就等於燒銀行...仲要係燒埋自己嗰隻...減壓有好多方法,唔需要用啲咁傷害自己o既方法o架.唱歌,跳舞,做運動,購物,食嘢,朱古力,喊,打拳...仲有好多"有益"o既方法都可以好有效咁減到壓o架..."為私"今鑊個代價都好大,唔知會唔會從此"消失"...大好人生,可惜可惜!
偷咗咁多日懶,今日要煲返煲湯喇...冇乜心機煮飯,又o黎傻魚最擅長o既"一鑊熟"...

有汁撈飯,個汁仲好啱傻馬口味,所以傻馬今晚食得好快.聽日好似會落雨喎...落雨去邊好呀,傻馬?