水旅館

尋晚傻馬打機打到好夜,而傻魚就同啲相摶鬥到好夜...今朝瞓到差唔多十一點至起身.由於尋晚有條茂利打打下機整瀉咗杯奶,搞到一身一地都係,仲要搞到條心愛毛巾變奶巾.結果尋晚有人冇毛巾"陪瞓",所以今朝傻魚要開機洗衫...又由於尋日落咗成日雨,部洗衣機入咗少少雨水,所以先洗咗部機先...等到差唔多十二點至可以將啲衫擺入機洗,然後出街...一出門口,就見到有兩位"朋友仔"歡送傻魚...

屋主隻黑貓,好鬼高竇唔多睬人o架...走咗過對面屋曬太陽...

唔知邊家o既貓,見到傻魚仲走埋o黎同傻魚玩...
原定係去台場睇車展,傻馬話個車展收三點喎.冇時間食嘢咪去便利店買飯團同飲品...一入便利店,又有"朋友仔"同傻魚打招呼喎...

真係好鬼死可愛o既啫...
買完快步去搭電車.去到新宿轉車嗰陣走咗架車要等廿分鍾.傻魚計一計啲時間,去到都成一點半,得返個半鍾睇車咋...傻馬就問傻魚點算,去唔去好喎...傻魚點知啫...係傻馬想睇車喎...傻馬就話上去飲杯咖啡先...上到去...

好好味咁喎...

冇理由拎住去玩o架...之後傻馬走咗去書店唔知搵乜,然後就話不如去品川水旅館,仲問傻魚點去...傻魚話品川有兩個水旅館,有一個喺駅附近,去到應該有指示.決定咗去邊就去搭電車...去到品川駅唔見有指示,又走去書店搵地圖.之後經過啲舖仔,傻馬話不如食咗嘢先喎...

傻馬諗完又係去食咖哩,仲話啲咖哩好辣...食飽起程...

呢邊好少o黎...

上埋個斜坡就到...入場一人一千八百円...一行入去例牌會經過條"海底隧道"...

嘩~最大條嗰條魔鬼魚個背有個好大o既心形圖案呀~

見唔到係乜魚添...

使唔使咁o既面口呀你...

好惡下喎你...個樣...

真係好大條...

細條魔鬼魚,好好笑容o架...

連魔鬼魚都興豹紋喎...
差唔多夠鍾睇表演喇...

三百六十度,全方位冇死位,呢個水池正呀!

開始喇...

係海豚表演...

不過有條傻魚o既"親戚",鯨魚...

滑豚呀~

我轉...我轉...我轉轉轉...

鯨魚都唔執輸,轉埋一份...

好好睇呀...睇唔到?

去片~
睇完見仲有半個鍾至到另一個表演,諗住周圍行下先...點知聽到廣播話下個表演場地有限,入滿人就會關門喎...見到好多人行入去,傻魚同傻馬都跟住入去霸返個靚位先...

係海獅表演...

幾個靚仔係咁追住條海獅o黎影相...好搞笑...
開始喇...分兩部份,用比賽方式...

第一隊,好鬼好笑...結果係贏咗o既...

第二隊,都好睇,但係冇咁好笑...
睇完表演就去睇第二啲魚...呢兩場表演係每個鍾梅花間竹咁做,所以唔怕睇唔到.

斑點魚...

好長o既魚缸...

好似蝌蚪o既魚...

企鵝仔呀~六點半可以睇啲企鵝仔食嘢,不過仲有兩個鍾,太耐唔等喇...

呢隻蟹定咗格...

佢其實仲細過個拳頭o架...

好靚o既水母...

你似隻鴿多過條魚喎...

"紋身魚",好搞笑...

呢啲魚半透明o架...仲有另一種全透明睇到啲內臟同骨o既魚...可惜影唔到...
呢間水旅館就係得咁大間,冇乜嘢睇...係睇佢啲表演值回票價咋...下次去另一個品川水旅館先..嗰個大好多.睇到四點幾就搵唔到嘢睇,決定走人.出到去就梗係行下精品店喇...傻魚見到有個龜同熊仔攬枕好得意,諗住兩個都帶晒返傻家.但係傻馬死都唔肯,話只可以買其中一個,仲話傻魚買完啲嘢返去收埋都唔用o既.買一個咪一個囉!哼!結果傻魚買咗隻龜,因為隻熊仔白色易污漕...買完之後傻馬話下次再買另一個,傻魚就叫傻馬自己o黎買畀傻魚.傻馬即刻話要返轉頭買...傻魚睬佢都傻,叫傻馬自己行返轉頭買...咁當然傻馬係唔會自己返轉頭喇...今次唔買咪下次買其他嘢囉...傻魚真係未驚過,去親邊都實有"禮物"o既...呵呵~
返到傻家附近順路去買埋啲日用品至返去.休息咗一陣又驅車去西口捕平嘢喇...可能遲咗少少,冇晒半價刺身添...買完嘢就諗去食乜...結果又走返去東口個"獅子會館"食泰國嘢...由於趕住出門口,傻馬唔記得帶相機...算喇...之前影過...今次食咗另一個骨膠原鍋,再加兩個小食,埋單六千二百六十円...貴咗啲...下次試下散嗌先...食完順路去埋"企鵝仔"托米...當然又係買唔停手,跌咗四千六百幾円...凈係今日就使咗二萬四千幾円...勁!!!使咗咁多錢買咗啲乜?

喺水旅館買o既大龜攬枕,另外仲有兩條手巾仔...幾鬼得意呀~

喺"企鵝仔"買o既...

紅圈嗰啲係喺"企鵝仔"買o既,其他就係喺西口間商場超市買o既...再咁買法,破產都似...