失眠

尋晚有人失眠...瞓之前仲講緊今日要返早一個鍾,十二點就"捐"咗入張被竇度...冇幾耐就聽到鼻鼾聲...由於瞓之前啱啱睇完"恐怖鬥室(五)",竟然發惡夢嚇醒咗喎...跟住就驚得滯瞓唔返,係咁騷擾傻魚...唉~驚就唔好睇喇...係都要睇o既話就日光日白嗰陣至睇囉...睇完搞到瞓唔到,係咪攞o黎搞呀?!!結果呢條茂利之後瞓咗一陣又要起身返工喇...正話一返到o黎就話喉嚨痛,仲要傻魚即刻開返張床瞓下...咁今晚又唔使瞓喇?
豬流感延伸到好多國家,終於入侵埋亞洲...韓國發現一個疑似個案,一個女人要隔離.世衛將個戒備由三級提升到四級,多個國際機場全面戒備,口罩一下子賣斷市...係咪要暫時戒豬呢?咁咪冇煲湯肉食囉?都係睇定啲先喇...巴西都好似有疑似個案喎...會唔會傳染埋畀啲雞o架?喂喂喂~唔好搞啲巴西雞喎...連巴西雞都感冒o既話,傻魚就冇啖好食o架喇...
又到咗星期二,又係入貨o既時候.驅車去到超市,諗住唔買咁多嘢...求其買啲雞翼,雞扒,長蔥,水菜,西蘭花,薯仔,士啤多梨,煲湯用o既豬肉,芽菜等等...仲有就係...

傻魚一見到呢包嘢,即刻諗起翠華o既豬仔包...好想食呀~!!!即買聽日試下整先...諗起啲水口就係咁流...都唔係買咗好多嘢啫...埋單三千零五十一円...吓?!!咁貴o既?

個湯...真係唔知係乜湯...要問返奶奶至得...個柚子豆腐好好味,下次再買!鹵水雞翼好好味呀!真係估唔到...傻魚掛住上網冇睇火,差啲煲燶晒啲雞翼...好在傻魚個鼻靈,及時熄火啫...凈係食個雞翼都可以食晒成碗飯.正~可惜啲汁冇晒...下次唔知仲可唔可以校返咁好味o既汁...傻魚食咗少少蟹,今晚傻馬對手會好忙...呵呵~
傻馬喺傻家嗰陣總係鍾意攬住條毛巾,瞓覺嗰陣當然唔可以冇咗條毛巾喇...呢隻傻馬仲要係死都唔畀人洗條毛巾,所以呢條毛巾有個花名叫"臭毛"!早幾日傻馬唔小心倒瀉支奶,搞到條"臭毛"變咗條"臭奶毛"...啱啱洗完變返條"香毛",正話傻馬食雞翼嗰陣又唔小心飛咗隻雞翼落大髀,跌喺條"香毛"上面...都話咗食飯嗰陣唔好攬住條"香毛"o架喇...今日開飯嗰陣啱啱至又再講完..係咪呢...飯都未食完,傻馬就叫傻魚開機洗"鹵水毛"喎...傻魚有開機呀,不過係洗咗機深色衫先啫...洗完至輪到啲淺色衫...係!傻魚特登o既...洗先洗後都好,今晚傻馬都係冇毛巾"陪瞓"o架喇...自作自受,與人無尤~又一次証明咗,不聽傻魚言,吃虧在眼前...不過,睇相佬話過傻魚講嘢係冇人會聽o既...今次已經唔知係第幾次應驗咗...算喇...