好味~食完返房休息一陣,然後拎埋啲行李去退房.八點鍾準時開車...
坐咗個幾鍾o黎呢到...
影下團體相...
又影下個人相...
入閘喇~
傻馬見到架車好興奮~
普通車係咁o既...
不過今次加車坐特別車輛,唔使同人迫...
咦?!!拉晒彩帶搞乜呀?原來今日係第一日開車,所以有個"開車大吉"儀式...
途中景色,靚~
又有水壩...
幻想緊...
如果係秋天紅葉滿佈...
一定好鬼靚...
下次要秋天o黎至得...
對頭車...
係水壩?湖?定河呢?
中間停一停,廁所時間...
有嚿石成磚佛咁...
有啲橋仔係畀馬騮過江...
呢啲地方真係啱晒傻魚...真係想喺度起間屋住...
山明水秀,正!!!
來回個半鍾,又返到原地...
上返旅遊巴,經過見到呢個噴泉...係溫泉水o黎o架...
又搭咗差唔多一個鍾...
今日午餐唔包,不過訂咗便当.好味~
食飽行下物產店,擺低幾兩...然之後又上旅遊巴去下一個景點...
呢度係傻馬好想o黎o既地方...
呢度都唔錯喎...
呢啲屋應該會冬暖夏涼...
食返個蕎麦雪糕先...當然,傻魚又係食幾啖就畀傻馬...呵呵~
畀二百円搭巴士上山...
去呢個展望台...其實可以行上o黎,但係要行四十分鍾...
好靚~
影相位...有專人用勁機幫人影,然後印出o黎賣返畀人...傻魚唔鍾意影相,梗係唔鬼睬佢喇...影完一輪就行返落山...
個頂有兩尺厚...
傻馬掛住影相,傻魚無聊周圍望見到呢啲唔知乜草,好得意...
嘩~滿開o既桜花樹呀!
空氣好清新...
呢啲屋有啲有人住o架...
呢間應該係吉屋...
醫院...噢...係治療院...
好靚呀~
有啲合掌屋用o黎做物產店...
呢間食店唔係合掌屋...
點解叫合掌屋?因為個屋頂好似兩隻手掌合埋咁o既形狀,所以就叫合掌屋喇...
連座寺同鍾樓個頂都係咁...
呢條橋叫做"であい橋",即係相識橋...睇條橋咁窄就知點解喇...
終於返到旅遊巴停車場附近...呢度要畀錢出去睇以前合掌村o既模樣同生活,冇乜時間所以冇去...
喺出面影下相就算...
呢兩隻嘢真係搞鬼...
都係因為冇時間,所以冇入去美術館睇...差唔多夠鍾返上車...
一場o黎到梗係乜都要試下喇...買畀傻馬食,傻馬話味道唔錯喎...
三點鍾開車,先去第一間酒店...今次呢個團喺第二日可以揀酒店,不過有一間係要加五千円.
尋日玩得太夜,今日就太早玩完...去到酒店差唔多五點鍾...呢間唔使加錢,都唔錯喎...係離開駅好遠...
喺酒店門口見到架酒店車,傻馬即刻跑去影...
間房都唔錯,有埋浴室唔使去大浴場沖涼...
擺低啲嘢抖咗一陣,諗住去便利店.落樓下櫃台問姐姐最近嗰間便利店喺邊,阿姐仔拎張地圖指畀傻魚睇...
行咗一陣都唔見間便利店...唔通係正話坐旅遊巴去酒店途中見到嗰間?好鬼遠喎...傻馬開始發脾氣,話個姐仔做乜唔講要行幾耐喎...人哋阿姐仔又點知呢兩條茂利係行去啫...再加上傻魚又冇問...算吧喇...返上房攤下,唔覺唔覺又到七點鍾...梳返個頭落樓食晚餐先...
今晚係自助餐...七點幾落到o黎見到凈返幾枱人...自己啲團友就得一枱,過咗一陣走埋添...
傻魚拎咗咁多嘢食...
傻馬一o黎就拎生果,仲話西柚得返呢一嚿喎...
傻馬之後又出去拎嘢食...食食下周圍啲人都走晒,得返傻馬同傻魚包場...
兩條友食鬼晒人哋啲蜜瓜...呢個份量食咗五碟,今晚實肚痛都似...之後見阿領隊哥哥o黎食嘢,好快食完又走咗.傻魚見啲阿嬸成日行出o黎望住傻魚同傻馬,就叫傻馬快啲食完返房唔好左人收工.食完行出餐廳見到一班西方人...噢...原來啲日本人咁鬼早食完係唔想同啲西方人迫...
今日坐車坐到好攰,之後又行到好攰...都係早啲瞓...聽朝零六四五起身,零七三零食早餐,零八三零起程...諗起都眼瞓...
沒有留言:
發佈留言