有錢派呀!

今日終於頂唔順,的起心肝"大掃塵"...首先,執咗個衣櫃,順手換埋季.跟住執埋張枱,食飯唔使就住啲位o黎擺餸...之後係咁一路執一路吸塵...間屋終於都似返間人住o既屋喇.真係執開有條癮,停唔到手...

之前喺東急手買完一直冇用過,今日就開張大吉...呢支嘢好用呀!傻魚今日用o黎清微波爐啲陳年頑固污積...

睇下~幾得o架!抺抺下望到個鍾,三點幾...弊!!!即刻換衫去郵局先...咁急去郵局做乜?咪去開儲蓄戶口囉...開儲蓄戶口做乜?因為日本地方政府派錢呀!!!派乜錢?日本地方政府話現時經濟差,所以派返啲錢畀啲居民舒緩下大家o既"荷包乾硬化症".雖然唔係好多,但係都好過冇.唔知係唔係区区都有得派呢?啲錢係直接入落個人o既儲蓄戶口度,所以傻魚咪要去開戶口收錢囉.尋日經過一輪研究,覺得郵局個儲蓄戶口會方便過其他銀行.起碼去到邊都搵到提款機,仲要係唔收手数料嗰度好.唔使限住邊日幾點去撳錢嘛...而且郵局應該都唔會咁易摺埋啩...開戶手續簡單,唔似銀行嗰啲要鬼咁多証明,o黎日本唔夠半年又話唔可以開戶咁麻叉煩...填完啲個人資料,等十分鍾,聽下阿姐姐講下啲基本嘢,拎埋啲存摺之類就走得.張提款卡要等兩個星期郵寄到傻家.
返到傻家,唔想執嘢喇...個微波爐,等下次條筋再摵起至清...執埋地下啲嘢就開始攤屍喇...尋晚食凈一塊西冷扒,今晚煎埋佢先...

整埋個黑椒汁,傻馬食唔停口...

傻魚見魚就煎,次次都搞到一頭煙...唔煎可以點喎?焗?燒...麻煩,因為要洗爐...