今日又約咗之前嗰位新朋友去食晏.食下傾下唔覺唔覺又兩個幾鍾.之後傻魚帶新朋友去另一間二手書店,今次傻魚搵唔到心水漫畫,反而新朋友就買到漫畫.買完就一齊去"企鵝仔"行下買下嘢,然後又一齊去超市買餸...其實係傻魚去買餸,新朋友唔使煮飯,所以陪傻魚買.
返到傻家開返個電視,"草剪光"單嘢鬧得熱烘烘...某高官仲開口批評"草剪光"係"最低の人間"...嘩~使唔使出口咁重呀?人哋都係飲醉咗先至咁啫...又唔係有心o既...唔可以咁話人o架啵...如果係個普通星斗小市民,應該唔會搞到上晒電視講足一日咁大鑊.呢啲係咪做名人o既代價呢?呢單嘢,唔知又會講幾耐..."草剪光"唔知要"消失"幾耐呢?唉~雖然傻魚唔係"粉絲",但係都覺得可惜...
抖咗兩日都仲覺攰...原本諗住煲湯煮飯整幾味...算喇...
一煲搞掂...材料有冬瓜,乾瑤柱,冬菇,蝦米,海參,雞肉同蜆.傻馬想落辣椒油,畀傻魚喝停咗...搞錯呀!!!冬瓜清熱o架嘛,整啲辣椒油落去咪嘥晒囉...咁好味o既湯,仲使乜加嘢喎...嘥晒傻魚一番心機...好在傻馬即刻停手冇加到啫...哼!呢隻傻馬一啲都唔識食,傻魚第時點帶傻馬去搵好嘢食呀?!!激死!!!
沒有留言:
發佈留言