呢團好多上咗年紀o既人,三十五歲以下o既得五位,當然包括傻馬同傻魚.可能因為咁,啲團友次次都好快就返到去集合地點,通常未夠鍾就齊人.好使傻馬同傻魚都會預早少少去集合,冇試過包尾或要成團人等...尋日去到上野駅,啲團友突然好似好熟咁同其他人寒暄幾句,講返句有緣再見至落車.落咗車之後,有位婆婆仲同傻魚講小心啲返屋企.哈!三日以來第一次傾偈...傻馬話啲人好假...人哋都係禮貌上打個招呼啫.話知人哋係真定假,自己係真心咪得囉.尋日場雨,返到東京都仲落緊,一路落到第二朝清晨...之後今日陽光普照...吹漲!!好在頭兩日都曬到屎餅咁,搞到傻魚個頭好痛...又好在唔夠瞓,一上車就瞓得著.如果唔係傻魚實暈車暈到反胃加偏頭痛,成晚瞓唔到,第二日做鬼都似...
今次出發前傻魚叫傻馬睇定個天氣預測,見第三日可能會落雨就帶定啲縮骨傘.好在有帶,等啲人拎得啲傘o黎都半濕喇...原來有啲旅行社會準備埋啲傘畀啲團友用.可惜今次呢間冇...一時冇留意係邊間添...失策!另外,今次遇見好多台灣團.間唔中會聲到有人講廣東話...西方人都唔少...第二晚間酒店就有一團法國人,餐廳出面部咖啡機突然好人氣...
團費兩人八萬五千六百円,自遊都係差唔多...便当,飲品,小食就使咗一萬三千四百一十一円...兩條友食三日,差唔多喇...手信就買咗七千五百一十八円.話就話手信,全部都係自己食o既...今次算買得少.其他搭巴士,搭特別車輛就使咗一千一百二十円.今次兩條友總共用咗十萬七千六百四十九円.總括o黎講今次玩得好開心.有機會都會再跟團去下其他地方.
都唔係買咗好多嘢啫...傻魚計錯數,執多一日衫,嘥咗啲位...如果唔係,應該會買多啲.個飛驒牛奶好飲呀!
去完旅行個人好攰,所以今日唔出街.出遊前清咗個雪櫃,不過唔緊要...傻家係唔會餓死人o既.
個烏冬係喺飛驒高山買o既,就係上邊左下角嗰包...一袋有三包,即刻整兩包o黎試下先...點解啲味噌湯苦苦地o既...仲有一包,點算?啲炸雞塊同個雞髀係冷凍食品,炸雞塊叮返熱,而個雞髀就擺埋落個烏冬度煲.個沙律o既材料有蘋果(終於食晒之前買落o既蘋果喇~),牛油果(出遊前唔夠熟所以留咗喺雪櫃...),番茄仔(之前買咗一大包食唔晒,留咗半包喺雪櫃,今日清晒喇~).求其又一餐,傻馬冇乍型...嘻嘻~
沒有留言:
發佈留言